Şaredarîya Amedî ya Şaristanê Girdî, pêroyê şaristanî de citekaran rê 200 hezar adrê mewyeyî vila kena ke tede 14 tewirê meyweyî est ê.
Serekîya Daîreya Xîzmetanê Dewe, bi projeyanê xo mîyanê şaristanî de dewam kena ke citekaran rê paştî bida. Projeya newîye de 17 qezayan de citekaran rê ke ameyeyê înan kêmî yo, goreyê rewşa îklîmî 200 hezar darê mewyeyî ke tede 14 tewirê meyweyî est ê, vila kena. Çerçewaya proje de 100 hezar fistiq, 5 hezar zeytûnî, 10 hezarî gozêrî, 65 hezarî vamêrî, hezarêk sayêr, hezarê beyî, hezarêk mûrîye, hezarêk alinçêr, 6 hezarî xurmeyê Trabzonî, 6 hezarî hinarêr, hezarê încilor, hezarêk tûyêr , hezarêk zî gilyazêr pêro pîya 200 hezarî şitilê daran bêrê vilakerdene.
Prosesê îhale dest pêkerd
Seba ke şitilî biresê citekaran prosesê îhale dest pêkerd. Serekê Daîreya Xîzmetanê Dewan Velat Ozerî dîyar kerd ke ê temsîlkaranê 17 qezayan reyde ameyî têhet û fikrê yewbînan girewto.
‘Seba pişdayîşê citekaran’
Serekê Daîreya XÎzmetanê Dewan Ozerî ke derheqê babete de melumatî dayî, dîyar kerd ke goreyê projanê perpirsîyarîya komelkî ê wazenê ke citekaran rê pişti bidê. Ozerî da zanayene ke çeleyê 2025î de yena îhaleya ci yena kerdene. Ozerî nê çîyî qeyd kerdî, “Na proje seba citekaranê kêmameyeyan ame viraştene. 17 qezayan de temsîlkaranê şaredarîyan reyde ma ameyî têhet û qisey kerd ke ma do nê şitilan senî vila bikê biresnê citekaran.”
Ozerî dî dîyar kerd ke ê sey Serekîya Daîreya Xîzmetanê Dewan do taqîbkerdoxê xebate bibê û dewam bikê ke pistî bidê citekaran. Ozerî da zanayene ke ê do citekaran rê perwerdeyê ‘şitilî senî yenê ronayene û miqatîya înan senî kerdene’ bidê.