Suryanîyê Ortodoksî 25ê Kanûna Verêne de dêranê Îstanbul, Mêrdîn, Şirnex û bajaranê bînan ê ke tede ciwîyenê de ayînê şodirî dir kom bîyî û bi Roşanê Yaldoyî û roja bîyayîşê Îsa Mesîhî pîroz kerd. Roşanê Yaldoyî 10 rojî rameno.
Suryanîyê Ortodoksî şodirê 25ê Kanûna Verêne de Roşanê Yaldoyî, bi vatişê "Brikh mavlodo d'moran" ke manaya ci "Roşanê rojabîyayîşê Homayî pîroz bo" ya, pîroz kerd.
Roşanê Yaldo, ke ziwanê Suryanî de manaya ci bîyayîş o, eynî çarçewa Noelî de bi tavistişê muman û wendişê duayanê bi nameyê roja bîyayîşê Îsa Mesîhî yeno pîrozkerdiş.
Suryanî zî nê roşanî sey Yaldoyî name kenê.
Verê pîrozkerdişê nê roşanî ra 10 rojî, rojî gênê ke nê rojan de ganî goşt, mast, penêr û çîyê sey nînan nêrê werdiş. 25ê Kanûna Verêne saetanê şodirî de dêranê xo de pîroz kenê.
Eynî roşan, tayê ziwanan de sey Roşanê Noelî zî yeno zanayîş. Vatiş latînkî ra yeno ke kokê ci Natalîs o û manaya ci bîyayîş a.
Vatişê Krîsmisî yanî Christmas vatişê Khrîstosa (Mesîh) yê Yunanî û messaya latînkî ra yeno.
Suryanîyê ke Îstanbulî de ciwîyenê beşdarê ayînê Yaldoyî yê ke Dêra Katolîk a Latîn a Meryem Anaya ya Bakirkoyî de ame viraştişî bîyî û seba Suryanîyanê Vakur û Rojhelatê Sûrîye dua kerdî û seba ke şer biqedîyo mumî vistî.
Suryanîyê Mêrdînî zî Dêra tarîxî ya Kirklarî ya qezaya Artukluyî de seba ayînê Yaldoyî ameyî têhet.
Dewa Suryanîyan a tarîxî Mîdînî ke girêdayeya qezaya Hezex a Şirnexî ya de, şarê Suryanîyan Roşanê Yaldo bi coş pîroz kerd.
