ZAZAKÎ NEWS - Serekê ABD Donald Trumpî, çend welatan rê Amerîka kerd qedexe. Welatanê sey Efganîstan, Myanmar, Çad, Kongoya Demokratîke, Ekvator Gîneyî, Erîtire, Haîtî, Îran, Lîbya, Somalî, Sûdan û Yemenî ra êdî kes nêeşkeno şêro Amerîka.
Bi nê qerarî, welatîyanê nê welatan rê dekewtişê ABDyî bi temamî qedexe bi. Onca hukmatî 7 welatanê bînan rê zî tayê sînorî ardî.
Trumpî, derheqê qerarê xo de yew vîdeo weşan kerd û vat: "Bi awayêko zaf asan, ma nêeşkenê welatanê ke ma nêeşkenê bi awayêko ewle û pêbawer merdimanê înan kontrol bikerê û test bikerê qebûlê Amerîka bike."
Koşka Sipî, eşkera kerde ke Trumpî, dima ke raporê Wezîrê Teberî Marco Rubioyî û rayedaranê bînan temaşe kerdo, no qerar girewto.
Fermanê Trumpî, bi taybetî kesê ke Efganîstan, Myanmar, Çad, Komara Kongoyî, Ekvator Gîneyî, Erîtire, Haîtî, Îran, Lîbya, Somalî, Sûdan û Yemen ra yenê, dekewtişê Amerîka înan rê qedexe keno.
Welatê sey Burundî, Kûba, Laos, Sîerra Leone, Togo, Turkmenîstan û Venezuela zî do bi sînoranê qismî û dekewtişê sînorkerdî yê welatîyanê xo ra rîbirî bibê.
Trumpî, serdema xo ya sereke ya serekkomarîye de zî serra 2017 de qerarêko nêzdî girewto û kewtişê welatîyanê Îran, Îraq, Lîbya, Sûrîye, Somalî, Sûdan û Yemenî ABDyî rê qedexe kerdbî.
Mehkemeya Berze ya ABDyî, serra 2018 de qerar dabî ke no qedexe goreyê qanûnanê bingeyînî yo.