ZAZAKÎ NEWS - Meymunê kapuçinî yê nêrî Girawa Jicaronî ya Panama de leyîranê meymunanê bînan diznenê. Zanistê biyolojî fikirîyenê ke nê hereketê înan seba 'zêdeyê wextî' yo.
Goreyê xebera Guardianî, zanistê ke videoyê girawe temaşe kerdê, vînayê ke, meymunê kapuçinî serranê 2022-2023 de tewr tay 11 leyîrê meymunê bînan berdê.
Ekolojîsta Zoe Goldsborough ke Enstîtuyê Têgêrayişanê Heywanan yê Max Planckî yê Almanya de xebitîyena vana: "No zaf ecêb o, mîyanê heywananê dinya de ma qet nêdîyo ke çîyêko winasî bîyo."
Goreyê vatişê Independentî, cigêrayoxî ke populasyonê girawe teqîb kenî, serra 2022î de yew meymunê kapuçinî ke nameyê ey 'Joker' nayo pa, yew leyîrê meymunanê bînan eşto xo paştî û berdo.
Cigêrayoxî ke no heywan teqîb kenî, dî ke meymunê nêrî yê ciwanî yê bînî zî leyîrê meymunî benê.
