Wezîra karê teberî ya Almanya Annalena Baerbock îfade kerd ke ê pêkerdişê mabênê HSDî û Şamî seba Sûrîyeyêka yewperçe, sey gamêka baş vînenê. Fransa, Almanya û Yewîya Ewropa zî pêkerdiş gamêka raşte qebul kerdî.
Wezîra karê teberî ya Almanya Annalena Baerbock hesabê xo yê Xî ser ra beyanatêk da û va: "Na game semedê Sûrîyeyêka yewperçe gamêka muhîm a."
Wezaretê karê teberî ya Fransa zî beyanatê xo de va ke, pêameyîşê entegrasyonî raşt o. Pêameyîşo sîyasî ya ke Amerdîka zî desteg dayo ci, seba ke Kurdî bibê parçeyê prosesê demkî û Sûrîye de aramî bibo, gamêka weş a. Fransa do xebata xo ya seba dîyalogê îdarekerdişê Sûrîye û Rojawayê Kurdistanî rê dewam bikero."
Temsîlkara sîyasetê asayîşî û têkilîyanê karê teberî ya Yewîya Ewropa Kaja Kallas zî va ke, a pêameyîşê entegrasyonî ya Rojawayê Kurdistanî ya bi Sûrîye reyde zaf baş vînena û no karo ke ameyo kerdene do seba Sûrîye hîna zêde îstîqrar bîyaro.