Hukmat paweno ke PKK goreyê ê vengdayîşî demêko kilm de kongreya xo virazo û qerarê fesihkerdişî bido.
Wezîrê Pawitişî yê Tirkîya Yaşar Gulerî va:
"Rêxistina PKK û hemê çekdarê aye ke cografyayanê cîya-cîyayan de fealîyetan kenê ganî verî qerarê fesihkerdişî bidê û raşterast û bê şert çekanê xo teslîm bikerê.”
Heta nika eşkera nîyo ke PKK do key kongrea xo virazo.
Partîya MHP ke serekê aye Devlet Bahçelîyî proseso newe da destpêkerdiş, bawerîya xo esta ke PKK demêko nêzdî de do gaman bierzo.
"Ma pawenê ke vengdayîşê 27ê Sibate bêro ca"
Hetkarê Serekê MHPyî Îzzet Ulvi Yonterî îfade kerd:
"Ma bawer kenê ke do rêxistina PKK demêko kilm de kongreya xo virazo û xo fesih bikero. Ma paweyê nê çîyî yê.”
DEM Partî MHP ziyaret kerd
Heto bîn ra roja pancşeme Hemserekê Konseya Îdarekerdişî ya Koma Komelê Kurdistanî (KCK) Cemîl Bayikî eşkera kerd ke seba ke ê bieşkê kongreya xo virazê ganî dewlet zî sey înan adirbest îlan bikero û va: "Nika nê şert û mercanê nikayînan de kombîyayîşê kongreyî tehluke yo."
Heto bîn ra Heyeta Partîya DEMî Meclîs de MHP zîyaret kerd. Heyeta DEMî saete 14.00 de AKP reyde zî do qisey bikero.
Heyeta Partîya DEMî de Hemserekê Partîya DEMî Tülay Hatimoğulları û Tuncer Bakırhan, Hetkarê Serekê Meclîsî Sırrı Süreyya Önder û Serekwekîla Grûba DEMî Gülistan Kılıç Koçyiğit ca girewtî.
Heyeta Partîya DEMî, hetê Serekê Serekê Pêroyî yê MHPyî Semih Yalçın, Hetkarê Serekê Pêroyî yo ke Mesûlê Huqûq û Karê Weçînayîşî yo Feti Yıldız û Herkarê Serekê Pêroyî İsmail Faruk Aksuyî ra amey qebulkerdiş.
Partîya DEMî do badê MHPyî saete 14:00 de grûba AK Partî zî ziyaret bikero.
