Mudirîya Pêroyî ya DÎSKÎ ya Şaredarîya Amedî ya Şaristanê Girdî, beyanatê xo de derheqê newekerdişê tarîfeya awe de dîyar kerd ke mufettişê Dîwanê Hesaban vato fîyatê awe ke DÎSKÎ tesbît kerdo malîyetî ra zaf kemêr o û vurnayîşê tarîfeya awe, zerûrîyêko qanunî yo.

Mudirîya Pêroyî ya DÎSKÎ, derheqê newekerdişê tarîfeya awe de beyanat da. Beyanatî de ame dîyarkerdene ke kontrolê Dîwanê Hesaban de mufettişan îfade kerdo ke "Awe ganî malîyetî ra kemêr nêro rotene, nêke do zerarê dewlete peyda bibo û no zerar do îdareyî ra bêro girewtene; fîyatê awe ke DÎSKÎ tesbît kerdo, malîyetî ra zaf kemêr o û vurnayîşêko newe zerûrîyêko qanunî yo."

Zerûrîyêko qanunî

Mudirîya Pêroyî ya DÎSKÎ dîyar kerd ke vurnayîşo newe yê fîyatê şuxulnayîşê awe, goreyê madeyê 23. yê Qanûnê ÎSKÎ yê nimreyê 2560î bî ke mufettişê Dîwanê Hesaban îşaret kerdo, zerûrîyêko qanûnî yo.

Sebebê zêdebîyayîşê tarîfeya awe

Beyanatî de ame dîyarkerdene ke zerûrîyetê qanûnî ra teber zêdebîyayîşê malîyetê enerjî, sewîyeya berze ya vindîbîyayîşê awe, vindîkerdişê mabênê tahsîlkerdişî de û berzbîyayîşê mesref û resnayîşî mecbur kerdo ke tarîfeya awe bêro newekerdene. Ame dîyarkerdene ke sewîyeya vindîbîyayîşê awe merkezê bajarî de %34, qezayan de %54 resaya reqemanê berzan; malîyetê enerjîya elektrîkî ke tesîsê pakkerdiş û pompekerdişî de yeno şuxulnayene, %48,20 berz bîyo û no hal rastêraşt tesîr keno malîyetî rê.

Beyanatî de ame teqîbkerdene ke pawitişê kalîteyê awa şimitişî seba weşîya şarî muhîm o û arde ziwan ke madeyê kîmyewî ke prosesê pawitişê awe de yenê şuxulnayene, malîyetê ci hetê berzbîyayîşê kurê dolarî ra berz bîyo. Beyanatî de ame îfadekerdene ke berzbîyayîşê sewîyeyê ÎFT (Endeksê Fîyatê Şuxulnayoxan) û EÛD (Endeksê Fîyatê Viraştişê Daxilî) zî rastêraşt tesîr kenê malîyetê pêroyî ser o.

Rêza tarîfeya awe ya Amedî

Beyanatî de ame dîyarkerdene ke hetê tarîfeya awe ra, Amed 30 şaristananê girdan mîyan de rêza 19. de yo û ame vatene "Ma şarî rê îlan kenê ke no newekerdiş ke ma viraşto, seba ke ma bieşkê xizmetê awa şimitişî ya bêvindertene, bi weşî û timûtim pêşkêş bikê, zerûrî yo."

Çime: Bultenê Şaredarîya Amedî