Dadgeha AmedÎ derheqê Serekê Şaredarî Baxlarî yo verîn yê AK Partî Huseyin Beyoglu de qirarê tepişyayîşî da.
Dadgeha Cezaya Girane ya Amedîya 10ine de Serekê Şaredarîya Baxlarî yo verîn Huseyin Beyoglu, hetkarê ey û karmendêk vejyayê mehkema vera.
Dadgehe qirar da ke Huseyin Beyoglu bêro tewqîfkerdiş.
Badê qirarê dadgehe Huseyin Beyoglu ame tepiştiş û erşawîya hepisxane.
Par Beyoglu û 14 merdimê xo ameybî tepiştiş labelê Beyoglu amebi veradayîş.
Hewteyêk verê cû dewlete seba ke dizdîye kerdê dest nabî mal û milkê înan ser.
Goreyo ke ame zanayîş, 14 kesê ke dest ronîyayo mal-milkê înan ser ê zî demê Beyoğluyî de Beledîyeya Baxlarî de şuxulîyêne, înan sey şebeke pereyê Beledîye diznayê. Serekê înan zî Huseyîn Beyoğlu bîyo.
Ame tepiştiş, dest ronîya malê ey ser
Polîsan dest na meteryalanê dijitalan, gelek pere, dolar û zerdanê înan ser. Vajîya ke nê kesan ser de demonceyî zî vejîyayê.
Beyoğluyî guya soz dabi ke do ximet biko!
31ê Adare 2019î de semedê Beledîyeya Baxlarî weçînayîş amebi kerdiş. O wext HDP se ra 71 rayî girewtbî û Beledîye qezenc kerdbî. Labê semedo ke dewaya namzedê HDP estbî Beledîye destê înan ra amey girewtiş û teslîmê namzedê AK Partî Hüseyin Beyoğlu bîy. Semedo ke Beyoğlu weçînayîş de bibi dîyîn mazbata dîya ey.
Wexto ke Huseyîn Beyoğlu ame weçînayîş, soz dabi ke o do Baxlar biko cayêko modern, miletê ucayî rê banan virazo, feqîrîye biqedîno û bibo xizmetkarê şarî.
Labele badê cû vejîya werte ke Huseyîn beyoğluyî xizmetêk nêkerdo, merdimê xo dekerdê mîyanê Beledîye û pa ê merdimanê xo îhaleyî rotî û mutehîtan ra pereyî girewtî.
