Fırat Şîn
Amed de aşma Çeleyê peyên de, dereceyê hewayî normalê xo ra 5-7 derece zêde şîyo. No vurîyayîş seba nê mewsîmî zaf normal nîyo û talukeyê huşkayîye dano.
Pisporê metorolojî vanê ke, goreyê serranê verênan, emser kewte serra tewr germe. Serra 2024î de zî varanî zaf kêmî varabî û na rewşe bîya sebebê kêmbîyayîşê awe û zereatî. Pisporî îqaz kenê ke eke emser zî varanî normal nêvarî do problemê cidîyî vejîyê meydan.
Dereceyê hewayî yo germ yê aşma Çeleyî, tesîrê xo cuya rojane ser o zî mojneno. Vatişê şarî gore, aşma Çeleyî normal de serd bîyêne û vaşî zergun nêbîyêne labelê emser her çî bîyo qelepê.
Çitkarî vanê ke eke hewa wina şêro, do mewsîmê zereatî de problem vejîyê meydan.
Mudirîya Metorolojî ya Amedî, beyanatê peyênî va ke, depoyanê awe yê bajarî zî kêmî bîyê. Vatişê berpirsîyaran gore, eke varan nêvaro, amnan de problemê awe do biba zêde.
Şaredarîya Bajarê Girdî ya Amedî, derheqê nê mesela de projeyê xopawitişê awe ser o xebetîyena. Labelê pisporî vanê ke çareserîya bingehîne atmosferî de karbondîoksît kêmî bibo û qaydeyê tebîetî bêrê pawîtene.
Goreyê raporê Rêxistina Dinya ke serra verêne weşanîyabi, vurîyayîşê hewawo global zaf ca de bîyo sebebê problemanê cidîyan. No rapor îqaz keno ke ganî dewletî û rêxistinî bi hawayêko cidî na mesela ser o bixebitîyê.