ZAZAKÎ NEWS - Tîmê futbolî yê Amedsporî û Umraniyesporî do maç kay bikerê û maçê Amedsporî reya ewilîne do kanalê TRT Kurdîyî de bi ziwanê Kurdkî (Kurmanckî) bêro weşanayene.
Hewteyê 36inî yê Lîga Yewine ya Trendyolî de maçê Amedsporî û Umraniyesporî do roja yewşeme saete 16:00 de Stadyumê Hekîmbaşîyî yê qezaya Umraniyeyê ya Îstanbulî de bêro kay kerdiş.
Kaykerdiş do raştraşt hetê TRT Kurdîyî ra bi ziwanê Kurdkî bêro weşanayene û no do bibo reya verêne.
Heta nika kaykerdişê Amedsporî TRT Kurdîyî de nêameyê weşanayene û no bîbî babeta munaqeşeyî.
Amedspor o ke zafaneyê kaykerdoxanê ey Kurdî yê, gelek rey bajaranê Tirkîya de rastê êrişanê nijadperestîye ameyo.
