Ciwananê Dêrsimî ra Çayan Demîr o ke Xozatî ra semedê gêrayîş pa hevalanê xo şibi Pulur kewt awa Munzurî. Demêk badê Çayan Demîr mîyanê awe de bêtêger ame vînayîş. Hevalê ey ey mîyanê awe ra vetî û xebere resna ekîban.
Çayano ke awe ra ame vetiş wedarîya Nêweşxaneyê Pulurî. Çayan nêweşxane de nêxelisîya û gan da. Semedo ke sebebê merdişê ey bêro zanayîş, otopsî ame kerdiş û tehqîqat dîya dest pêkerdiş.
Çayan Demir mîyanê derdorê xo de merdimo sey ardimkerdox û zerrîweş amêne zanayîş. Merdişê ey bi sebebê xemgînîye. Çayan Demir vejyabi programê CAN TV Heqibê Perperikî û kilama ‘Heyderê Mi’ vatbî.
