Vizêr Anqara de Şîrketê Feza û Hewayî yê Tirkan (TUSAŞ) rê hêrişo bombeyîn amebi kerdiş û 5 tenî hêriş de merdbî.
Tirkîya nê hedîseyî ra dima zaf cayanê Rojavayê Kurdistanî rê êrîş kerd.
Hêzanê Surîya Demokratîke (HSD) îlan kerd ke êrîşanê Tirkîya yê Rojavayê Kurdistanî de 12 sivîlî amey kiştiş.
Gore malumatî, eskerê Tirkîya hewayî ra û erdî ra bi teyarayanê şerî , teyarayanê bêmerdiman û çekanê girdan êrişê Til Rifet, Til Temir, Qamişlo, Kobanî û Minbicî kerdî.
Goreyo ke ame musayîş teyarayanê Tirkîya dayo îstasyonê elektrîkî yo ke Kobanî de, merkezê weşîyê yo ke Qamişlo de û awnîyê stratejîkî yê ke kantona Cizîrî ro.
Til Rifet, Efrîn û Şehba de 4 sivîlî merdî û 10 kesî zî birîndar bîy.
Goreyo ek ame musayîş hêrişanê Tirkîya de 12 sîvîlî ameyê kiştiş.
No yew sucê şerî yo.
Fermandarê Pêroyî yê Hêzanê Surîya Demokratîke (HSD) Mezlûm Ebdî, derheqê êrîşanê Tirkîya yê herêma Îdareyê Xoserî de beyanat da.
Gore xeberê Rudawî, Mezlûm Ebdî hesabê xo yê X ra derheqê nê êrîşan de mesajêk vila kerdo û vato:
"Tirkîya bêserûber û bêbingeh herêmanê ma bombebaran kena, merkezanê xizmetî û weşîye û sivîlan kena hedef. No sucê şerî yo. Ma zaf rey xo seba dîyalogî hadre kerdbî. La wa bizanê ke ma seba pawitişê şarî û erdê xo hazir ê."
Dem partî ra beyanat
DEM Partî zî derheqê êrişanê Tirkîya de vat: ''Hêrişê vera tesîsanê TUSAŞî ra dima hêrişê hewayî dîyayî destpêkerdene. Nê hêrişî do bibê sebeb ke şîdet bizêdîyo. Xeylê merkezê Rojawanî bi taybetî Kobanê dîyenê bombayan ver ke nê cayan de cuyê sivîlan visîyenê binê tehlukeyî. Tesîrê şerî seba pêro terefan do bibê sebebê felaketî. Operasyonê ke sivîlan hedef kenê huqûqê mîyanneteweyî binpay kenê. Şer û pêkewtişî teyna benê sebebê dej û qehrî. Ma venga pêro terefan danê ke dîyalogan bikerê û rayîrê çareserîye ra şorê.''
Çi bîbî?
Anqara de qezaya Kahramankazanî de Şîrketê Feza û Hewayî yê Tirkan (TUSAŞ) ser o êrîş virazîyabi.
Gore beyanatê Wezîrê Karê Zereyî yê Tirkîya Alî Yerlîkaya êrîş de 5 kesî amey kiştiş û 22 kesî zî birîndar bîy.
Gore beyanatê Yerlîkaya 2 kesê ke êrîş kerdbî zî amey kiştiş.
Heta nika nêameyo eşkerakerdiş ke êrîş kam hetî ra ameyo kerdiş.
La Tirkîya nê êrîşî ra dima Başûr û Rojavayê Kurdistanî ser o êrîş kena.
