Nêzdîyê se westeyê kadayîfe û karkerê ke Diyarbekir de xebitînê, semedê waştişê zêdekerdişê meaşanê ewro nêşîyê karê xo ser û Diyarbekir ewro bê kadayîfe mende.
Kadayîfa burma ya qeydkerdî ya Diyarbekirî zaf namdar a û Dîyarbekir de bi destê westeyanê Çolîgijan yena viraştiş.
Nêzdîyê se westeyê kadayîfe û karkerê ke 6-7 kargehanê bajarî de xebitînê, semedê debara cuye û enflasyonî, kargehan ra waştê ke meaşê înan bêro zêdekerdiş.
Na çarçewa de karkeran kombîyayîşê xo yê kargehan dir waşt ke meaşê înan bêro zêdekerdiş. Wayîrê kargehan va ke, ê encax eşkenê serra newîye de meaşan zêde bikerê.
Karkeran pêroyê bajarî de dest kar ra verada
Naye ser westa û karkerê ke her roj bi seyan kîlo 'kadayîfa qeydkerde' virazenê, qerar day ke yew roje dest kar ra veradê.
'No heqê ma yo'
Westeyêk Amida Haberî rê va ke, seba debara cuye û enflasyonî ma no qerar girewto: "Ma karkerê ke bi serran o qedeyîfa qeydkerdî ya Diyarbekirî virazenê la kes ma nêvîneno. Ma zî sey her kesî wazenê şertanê însanî de keyeyê xo îdare bikerê. La debara cuye û enflasyon her roj tesîrêko xorîn ma ser o keno."
Haşim Elkaan, Serekê Odaya Lokantacî, Kebabcî û Şîranîviraştoxanê Diyarbekirî (DİLTO) zî va va ke, heme şîranîviraştoxan de dest kar ra veradayîş çin o, tenya karkerê 6-7 kargehan dest kar ra veradayo.
Serra newîye de do zêdekerdiş bibo
Elkaanî wina va: "Wextê xebata westeyan ke sektorê kadayîfe de xebitînê xora 4-5 saetî yo. Sey karanê bînan nîyo. Ê serê sibayî ra heta saete 8ê şanî nêxebityenê. Ê 4-5 saetan de karê xo qednenê şinê keyeyanê xo."
