Hemşaredaranê Şaredarîya Amedî ya Şaristanê Girdî Serra Bucak û Dogan Hatunî, Serekê CHP’yî yo Pêroyî Ozgur Ozel kerd mêman.
Serekê CHP’yî yo Pêroyî Ozgur Ozel û heyetê ci, Şaredarîya Amedî ya Şaristanê Girdî zîyaret kerde. Badê pêşwazîye Hemşaredarî û Ozel şîyî awanîya şaredarîye ya xîzmetî.
Hemşaredare Bucak: Zîyaret seba ma erjîyaye yo
Hemşaredare Serra Bucak zîyaretî de qisey kerd û bi selamdayîşê beşdaran va: "No zîyaret seba ma erjîyaye yo. Şima badê weçînayîşanê 31ê Adare sereko pêroyî yo diyine ke Şaredarîya Amedî ya Şaristanê Girdî zîyaret kenê. Seba ma hetê DBB’yî ra ewro manaya xo ya bîne zî est a. Ma sey hemşaredar û endamê meclîsî yê weçînayeyî dest bi xebatan kerd û badê 8 serran Teşkîlatê Herême yê Rojhelatê Mîyanên û Asyaya Rojawanî yê Şaristananê Yewbîyayeyan û Rayberîyanê Herêmkîyan (UCLG-MEWA) rê mêmandarîye kerd. Zîyaretê şima yo erjîyaye zî ewro tesaduf bî. Ma coka keyfweş ê. Badê weçînayîşanê 31ê Adare 2024î bajaranê welatê ma yê muhîman de rayberê weçînayeyî yê herêmkî ser o sîstemê qeyyûm û xesbî 8 serrî yo ameyo tetbîqkerdene. Ma binê sîya nê sîstemî de dewreyê weçînayîşanê herêmkîyan kerd. Hem weçînayeyê ma yê DEM Partî hem zî îdareyê CHP’yî û parlamenterî û hêzanê demokratîkan îfade kerd ke no rejîmê qeyyûmî êdî qedîyayo. Binê naye de çîyo ke nimite yo no yo: Ma sey hêzê ke bi demokrasîya herêmkîyan û bi awanbîyayîşê demokrasî yê herêmkîyan bawerîya ma est a, ma va şaredarê weçînayeyî û îdareyê înan seba awanbîyayîşê demokrasî yê herêmkîyan û seba awanîya hereme ya pluralîste tewr munasib ê."
'Ma ameyî merheleya muhîme'
Bucak qeyd kerd ke şaredarîye de 6 aşmê înan temam bîyê û va, înan 6 aşman de partîya xo û CHP’yî ra îzahatê muhîmî yê derheqê îdarekerdişê demokratîkî yê şaristanan de eşnawitê. Bucak bale ant terzê beşdarîyê herêmkîyan ê tewr muhîmî ser o û wina dewam kerd: "Ma naye esas gênê. Ma pawitişê beşdarîya îdareyî ke bi encamê rayîrê sandiqan vetê, kenê. Bi no hewa ma welatê xo û şaristananê xo de ameyî prosesêko muhîm. Ma hetê îdareyê herêmkîyan ra û hetê îdareyê şaredarîyan ra ameyî merheleya muhîm. Pê îtîfaqê dostanîye û têkîlîya germe ke ma viraştê, o aks keno ke problemê demokratîkbîyayîş û azadbîyayîşî rayberîya nê her di partîyanê ma de do bêrê çarekerdene. Ma bi no hewa wazenê sipasîya xo CHP’yî rê bikerê ke înan ra weçînayîşanê herêmkîyan ra heta ewro desteg û paştîdayîş dîyo. Ma ewro heyetê CHP’yî û Serekê Pêroyî Birêz Ozgur Ozelî rê mêmandarî kerde û ma wazenê qalê dîplomasîya mabênê şaristanan û hetkarîye bikerê û biewnîyê gelo seba şaristanê ma û herêma ma ma eşkenê se bikerê? Ma do senî demokrasîya herêmkî xurt bikerê û halê beşdarîye de senî hemkarîya şaranê xo virazê? Seba zîyaretê şima ma sipas kenê."
Hemşaredar Hatun: Şar wayîrê îradeyê xo vejîya
Hemşaredar Dogan Hatunî îfade kerd ke ê bi keyfweşîye pêşwazî kenê û va: "No zîyaret ganî bibo sebebê hemkarîyanê neweyan. Îradeyê şarê Amedî 8 serrî ame astengkerdene. Bi sîyasetê qeyyûman zaf zirar dîya îdareyê nê şarî. Wexto ke rayberîyê herêmkî yenê girewtiş û kesê weçînayeyî karê xo nêkenê, şarî rê zaf zulm beno. Ma nika weş vînenê ke nê 8 serranê peyênan de çi ameyo sereyê şarî. Cayêkî de eke zulm bibo, uca de ne ziwan ne kultur ne zî xizmetî benê. Sîyasetê qeyyûman puç vejîya, şarî wayîrê îradeyê xo vejîya. Eşkera bî ke tetbîqê qeyyûmî xelet o. Demê înan de çi xizmetê bingeyînî sey awa şimitişî û kanalîzasyonî zî nêbîyo, zaf qezayanê ma de problemê awe est o. Her çi ke verê qeyyûman ameyo kerdene, uca de mendo, ma do uca ra xebatanê xo dewam bikerê. Ewro ma cayêko muhîm de yê."
'Ez selam dana îradeyê şarê Amedî'
Serekê CHP’yî yê Pêroyî Ozelî zî ard vîrardene ke verê nê zîyaretî de ey Edîrne de Selahedîn Demîrtaş û Selçuk Mizraklî zîyaret kerdo û behs kerd ke senî parlamenteran ra meafîyet ameya wedaritiş û şaredarî ra xebat ameya girewtiş û cayê înan de qeyyûmî ameyî tayînkerdene. Ozelî va: "Ez şexsê Hemşaredare Serra û Hemşaredar Doganî de selam dana îradeyê şarê Amedî. Dima ez reyna selam dana Selçuk Mizraklîyî ke bêheqîye zereye de yo. Selahedîn Demîrtaşî zanayêne ke ez do bêra tîya zîyaret bika, mi silamê ci ardî. Ez hêvî kena ke rojêk o bi azadîya xo do tîya bo û ma do pîya qehwe bişimê. Ez reyna seba ke şima weçînayîşê 31ê Adare de heqê îdarekerdişê nê şarî bi ferqêko berz girewt, seba na serkewtene ez şima pîroz kena."
'Ziwanêk o ke ma ey rê hurmet kenê'
Ozelî va ke ey bi dîqet goşdarîya Serra Bucak kerda û aye çîyê zaf muhîmî vatê û wina dewam kerd: "Dima Hemşaredar Doganî bi ziwanêk qisey kerd ke bi vatişê meclîsî ez nêzana la no ziwanêko ke ma nêzanê û ma nêhesibnênê nîyo, ma nê ziwanî rê hurmet kenê. Ey bi ziwanê dayîka xo qisey kerd, ganî ma sey Dewleta Komara Tirkîya hurmet bikerê ke o bi ziwan dayîka xo qisey bikero û xo wina îfade bikero."
'Ma zî bîyê parçeyê îtîrazî'
Ozelî qeyd kerd ke ewro muhîm o yo ke Şaredarîya Amedî ya Şaristanê Girdî de qeyyûm çin o û wina va: "Çîyê ke Serra Bucak ser o vindertî zaf erjîyaye yê. Verê Wan de wexto ke înan waşt mazbata bidê vindîkerdoxî, ma zî bîyê parçeyê îtîrazêko pîl. Ma bi heyetêko bihêz uca de bî û heta ke o problem safî nêbî ma uca ra mêşîyî û raştîya xo zî no bî, uca de encam gêrîya. Ma Colemêrg de zî wexto ke vera qeyyûmî reaksîyono tewr huşk da û ma uca de bîy. Ez vatişê Birêz Demîrtaşî tekrar kena. 31ê Adare de ma bi hewayêko ke 47 serrî ra dima partîyêk Tirkîya de bîya yewin û hem zî vera sîyasetê qeyyûmî helwestêko eşkera û hişk nawnayo, ma ser kewtê, ez ney muhîm vînena. Na yew serkewten a.”
'Ez kuçeyan ra samîmîyet vînena'
Ozelî bale ant kerdişanê ke Ankara de ameyê kerdene û va: "Tîya ra, Amed ra venga şima dana. Roja Dişeme bi vatişanê Birêz Bahçelî prosesêko newe yeno munaqeşekerdene. Ez eşkena hende sey şima û Birêz Sezgînî Amed de hakim nêba. La sey yewê ke zaf ameyo Amed û ewro zî kuçeyan ra gêrayo, ez vînena ke kuçeyanê Amedî de hêvîyê ke ameyo girêdayene aştî û biratîye rê est o û tersêk û bêbawerîyêk est o ke girêdayeyê prosesî yo. Ez vînena ke samîmîyet est o û şar paweyê naye yo ke heme sîyasetmedarî samîmî bibê. Çunke sazgeha sîyasetî û êyê ke Tirkîya îdare kenê, bêheqîyê zaf girdî kerdê."
'Hewcedarîya pakkerdişê rayîrî est a'
Ozelî reaksîyon nîşan da wedaritişê şaredaran û va: "Ez tîya ra Şaredarîya Şaristanê Girdî ra venga şima dana. Hewcedarîya pakkerdişê rayîrî est a, wexto ke badê cezadayîşî şaredarî kar ra yenê girewtiş, ganî meclîs şaredarêk weçîno. KHK'yo ke bîyo sebebê wedaritişê şaredaran, bi xebata qanûnî ya di saetan eşkeno meclîs de bêro wedaritiş."
Hemşaredaran kitabê "Serê Şevê Çîrokek" ê Selîm Temoyî û resmê çînîyî yê Mem û Zînî dîyarîya Ozelî kerd; Ozelî zî "Cumhuriyet Ateşi" dîyarîya Hemşaredaran kerd.
Zîyaretî de Sekreterê Pêroyî yê Şaredarîya Şaristanê Girdî Emrullah Gorduk, Hetkarê Sekreterê Pêroyî, endamê meclîsî, Parlamentera DEM Partî Adalet Kaya, Hemserekê Bajarî Gulşen Ozer û Abbas Şahîn zî amade bîy."
Çimeyê xebere Bultenê Şaredarî Bajarê Girdî ya Amedî
