Dêrsimê Vakurê Kurdîstanî de zordarîya ke elewî û kêmanîyanê Sûrîye ser o ya ame protestokerdiş.
Platforma Ked û Demokrasî ya Dêrsimî seba protestokerdişê şidet û zordarîya ke elewîyanê Sûrîye ser o benê yew rayîrşîyayîş organîze kerd û xoramojnayoxî ver bi Meydanê Seyîd Riza şîyî.
Serekê Şaxa Dêrsimî ya Komeleya Pîr Sultan Abdalî Ekber Kayayî nameyê platformî ser o yew beyanat da û îşaret bi qetlîamanê Mereş, Sêwaz, Dêrsim û Çorumî kerd.
"Vera Nasname û Bawerîyanê Cîyayan Zordarîye Kenê"
Serekê Şaxa Komeleya Pîr Sultan Abdalî Ekber Kayayî wina qisey kerd:
"Sûrîye de grûbê çekdarî yê ke hukmat girewto xo dest û Tirkîya zî piştgirîya înan kena, vera nasname û bawerîyanê cîyayan zordarîye kenê.
Elewî, kurd, xirîstîyan, durzî û kesê ke goreyê şerîetî hereket nêkenê, yew zilmê sîstematîk, şidetêko giran û mergî dir rî bi rî yê.
Nê kesî seba ke sucanê înan esto nê, tenya semedê nasname û bawerîya xo yenê hedefgirewtişî.
Kiştişê bi no hawa verê cû Dêrsim, Mereş, Çorum û Sêwaz de bîbî. A wext de zî şar seba çalakîyanê xo nê, tenya seba bawerî û nasnameyê xo amebî qetilkerdiş."
