Yuksel Guran, Enes Guran û Salîm Guranî cezayê giranê heta hetayî, Nevzat Bahtîyarî 4 serrî û 6 aşmî ceza girewtî
Dadgeha 8. ya Cezaya Girane ya Dîyarbekirî de ronişteya dîyine ya doza Narîn Gurana 8 serreyîne ameye dîyayîşî û dadgehe qerarê xo da.
Goreyê îdîanameya ke hetê Serdozgerîya Komare ya Dîyarbekirî ra amebî amadekerdiş, sucdarê tepişteyan apê Narînî Salîm, maya aye Yuksel, birayê aye Enes û cîranê înan Nevzat Bahtîyar bi "kiştişê domanan o bi hemkarîye" ameyênê sucdarkerdiş û seba înan cezayê heta hetayî ameyêne waştişî.
Avukatê Salîm Guranî, Yuksel Guranî û Enes Guranî îşaret kerd ke seba ke yew delîlo qetî çin o, waştişê veradayîşê muwekilê xo kerd.
Avukatê Nevzat Bahtîyarî yo ke cenazeyê Narînî nimitbî zî va ke ganî Nevzat tenya nimnayîşê cenazeyê Narînî ra bêro cezakerdiş.
Dadgehî bi sucdarîya kiştişî Yuksel Guran, Enes Guran û Salîm Guranî rê cezayê giranê heta hetayî birna.
Dadgehî 4 serrî û 6 aşmî cezayê hepisî da Nevzat Bahtîyarî.
Se Bibî?
Narîn Gurana 8 serreyîne, 21ê Tebaxe 2024î de dewê Çiluyî ya qezaya Rezanî ya Dîyarbekirî de "vîndî" bîbî û 8ê Êlule de cenazeyê aye çemê ke dewa ra nêzdî bi de amebi vînayîş.
A deme ra nat Serdozgerîya Komare ya Dîyarbekirî derheqê hedîse de yew tehqîqat dabî destpêkerdiş.
Goreyê raporê tibê dadî, Narîn Guran ameya xeniqnayene.
