Dîyarbekir de dewaya kiştişê Narîn Gurane de Nevzat Bahtîyaro ke 4 serrî 6 aşmî ceza girewt, Keyeyê Ey Seba ewleyîye dewe ra bar kerd.
Dewa Tavşantepe ya qezaya Baxlarî ya Dîyarbekirî de Narîna 8 serreyîne ya ke badê ke şîbî qursê Quranî vîndî bîbî û 19 rojî ra dima cenazeyê aye binê Çemê Egertutmazî de vejîyabî, dewaya kiştişê aye de dadgehe qerarê xo eşkera kerd.
Maya aye Yuksel Guran, birayê aye Enes Guran û apê aye Salîm Guranî hepisê muebedê giranî girewtî.
Nevzat Bahtîyarî 4 serrî 6 aşmî cezayê hepisî girewt
Qeraranê dadgehe ra tewr balkêşî, Nevzat Bahtîyarî yo ke qebul kerdbi ke cenazeyê Narînî berdo çem, ey rê dayîşê ceza bi. Bahtîyaro ke sucê kiştişî ra beraet kerd, seba sucê nimitişê delîlan û vinîkerdişê înan 4 serrî û 6 aşmî cezayê hepisî girewt.
Keyeyê Bahtîyarî dewe ra bar kerd
Qerarî ra dima keyeyê Bahtîyarî ra beyanato verên ame. Lacê Nevzat Bahtîyarî Ferhat Bahtîyarî rojnameyê Duvarî ra Ferhat Yaşarî rê qisey kerd. Ferhat Bahtîyarî va ke, gama ke cezaya pîyê ey bewlî bî, înan dewe ra bar kerdo û seba sebebê ewleyîye ê nêeşkenê vacê ke kamca de yê.
