Aşxaneyê Şarî ke seba werdê erjan, pak, biweşîye û ewleyî xizmet dano şarî, Qezaya Baglarî de abi.
Şaredarîya Şaristanê Girdî, hûmara Aşxaneyê Şarî ke şarê feqîrî rê werdê erjan, pak û biweşîye dano, kerd 2. Serekîya Daîreya Xîzmetanê Sosyalan a Şaredarîya Şaristanê Girdî ke 29ê Tebaxe de Kuçeyê Hunerî yê Taxa Kooperatîfan a Qezaya Yenîşehîrî de Aşxaneyê Şarî akerdbî, seba şubeyê dîyin Cadeyê Emekî yê Taxa Mewlana Xalîd a Qezaya Baglarî de xebatê xo qedênayî.
Merasîmê akerdişî yê Aşxaneyê Şarî ke amadekarîyê ey qedîyaybî, Hemşaredarê Şaredarîya Amedî ya Şaristanê Girdî Serra Bucak û Dogan Hatun, Hemşaredarê Baglarî Sîrac Çelîk, Sekreterê Pêroyî yê Şaredarîya Şaristanê Girdî Emrullah Gorduk, Hetkarê Sekreterê Pêroyî Reşat Bakan, Azîz Ozdogan, Hemsereka DBP’yî ya Şaristanî Sultan Yaray, sporkarê Taximê Voleybolê Cinîyan ê Ciwanan ê Şaredarîya Şaristanê Girdî, serekê daîreyan û şarê qeza beşdar bîy.
Hemşaredare Bucak: Ma do Aşxaneyê hîrêyinî Berê Koyî de akerê
Hemşaredare Bucak ke merasîmê akerdişî de qisey kerd va ke ê ewro şubeyê dîyin yê Aşxaneyê Şarî Baglar de şarî reyde akenê û wina dewam kerd: "Ma nê warî de zaf şa bîyê. Ma tîya ra sipasê heme embazê ke keda xo daya, MED A.Ş. heme xebatkarê Şaredarîya Amedî ya Şaristanê Girdî û serekê daîreyan kenê ke demêko kilm de aşxaneyê ma yo dîyin akerd û amade kerd. Ma do hema Aşxaneyê Şarî yê hîrêyinî zî Berê Koyî de akerê. Embazê ma êdî xebatanê xo dewam kenê."
'Ma wazenê ke na proje gird bikê'
Hemşaredare Bucak qeyd kerd ke Ofîs de Aşxaneyê Şarî ke înan akerdo, şarî ra reaksîyonê positîfî girewtî û wina dewam kerd: "Na xebate ke şarê ma hes keno û qebul keno, ma zî wazenê ke dewam bikê. Helbet ma wazenê ke na û xebatê sey naye dewam bikê, aver şêrê û gird bikê. Çunke ma na berpirsîyarî girewte û verê weçînayîşê 31ê Adare de ma soz da şima pêrune rê."
'Ganî polîtîkayê qeyyûmî ra fek bêro veradayene'
Hemşaredare Bucak derheqê qeyyûman de zî va: "Esenyurtî ra dest pê kerd û Mêrdîn, Batman û Xelfetî de dewam keno, qeyyûmî yenê tayînkerdene. Ma 8 serrî yo nê mîkrofonan ra bi wasitaya partîya ma, hemşaredarê ma, weçînayeyê ma û xebatkarê zereyê şaredarîye zaf rey va ke qeyyûm çi yo. Qeyyûm sistemêko antî-demokratîk o, hukmato ke weçînayîşî de nêşêno bi dest fîno, bi metodêko antî-demokratîk, bi hawayêko bêmeşrû dest nano îradeyê şarî ke vejîya sindoqê weçînayîşî ser û xesb keno û bi no hewa nê heqî xo rê gêno. Ma qeyyûman nêşinasnenê, ma tîya ra venga sistemî danê ke qeyyûman dewam keno. Rayîrê qeyyûmî rayîr nîyo. Ganî polîtîkayê qeyyûmî ra fek bêro veradayene. Çunke bajar, şaredarî û cayê ke şima qeyyûm tayîn kenê, tede bêhuzurî, xesp, talan, dizdiye û bêedaletî resayo sewîya tewr berze. 8 serrî yo ke nêşinasnayîşê îradeyê nê şarî û verdayîşê bajar, şaristan, şaredarî û rayberîyanê herêmkîyan nê zîhnîyetê dizdî û xespkerî rê qet çîyêko weş nêardo."
'Ma her tim tîfaq de bê'
Bucak ard vîr ke weçînayîşê 31ê Adare 2024î de bajar de înan partîya dîyine ra 4 qatî zêdêr girewtê û şarî ê weçînayî û wina dewam kerd: "Ganî hukmat naye qet vîr ra nêko. Eke ti vajê ke 'Ez rayê ke to dayo sindoqê weçînayîşî de nêşinasnena' cayêko mueyenî yê Tirkîya de, mintiqayêke de, şarî yan zî welatijanê xo rê, o wext tîya de problemêkê huqûqê welatîyan vejêno meydan. O wext do tîya de şaranê ma rê zî heqêko meşru û raşt bo ke hukmê to bipersê. Na mana de ma derhal wazenê ke qeyyûmê ke mintiqaya ma de ameyê tayînkerdene pêser bêrê antene. Ma tîya ra reyna vanê. Ma silam danê şarê xo ke hewteyek o kuçeyan ra vera qeyyûman têkoşîn dano, ma hes û bawerî kenê û bi hêvî yê. Her çiqas hukmat û çapemenîya ey na têkoşîna meşru, heqdar û demokratîke biwazê krîmînalîze bikerê zî ma pawitişê heqê îtirazî yê şarê xo ke keyeyê xo ra vejîno şono karê xo, mekteb û bazarê xo û dima barîyerê vera şaredarîye protesto keno."
Bucak venga şarî da û va "Piştîya xo ma ra mebirnê. Ma her tim tîfaq de bê."
Hemşaredar Hatun: Ma çimeyan şarê xo rê sey xizmet şuxulnenê
Hemşaredar Hatunî ard vîr ke înan verê weçînayîşê herêmkîyan soz dayo ke her warî de xizmetê şarî bikerê û wina qisey kerd: "Krîzê ekonomîkî est o, şarê ma nêeşkeno parçeyêk nan bero keyeyê xo. Êyê ke nê welatî îdare kenê nêeşkenê veyşanîya şarî rê çareyêk bivînê, la her tim seba herb amade yê. Ê toximê nîfaqî ancenê mîyanê şarî û qatê komelî yewbînan rê kenê cîya. No zî êdî manaya xo a ya ke ê nêeşkenê nê welatî îdare bikerê. Ganî no hukmat êdî şêro. Ma vanê 'Ma hetê aştî ra yê hetê dişmenîye ra nîyê'. Ma heme îmkan û çimeyê şaredarîye sey xizmet şarê xo rê şuxulnenê. No aşxane seba ke tayê şarê ma yê dezawantajinî zî bieşkê nê fersendî ra îstîfade bikerê, yeno akerdene, ma do heme taxan de aşxaneyanê şarî akerê. Eke ma tena rojêk zî serekê na şaredarîye bê, ma do a roje zî bi xizmetî vîyarnê. Ma nêtersenê, şarî ma ardo tîya, şar çi vajo; ma do vajê 'Ser seran û çiman ser!”
Aşxane ame akerdene
Badê qiseykerdişî Hemşaredaran qurdela birnaye û Aşxaneyê Şarî akerd. Hemşaredaran dima ke aşxane dî, werd vila kerd. Aşxaneyê Şarî de ewro seba akerdişî werd bêpere vila bî.
4 tewir werd 70 TL
Aşxaneyê Şarî yê Qezaya Baglarî ke do roja yewşemeyî ra teber her roje saete 12:00-17:00î de xizmet bido, tede 4 tewir werd bi 70 lîra do bêro dayene. Aşxaneyê Şarî de do rojê 1000 kesî rê xizmet bêro dayene."
Çime: Bultenê Şaredarîya Amedî
