Hemşaredaranê şaredarîyanê DEM Partî, munasebetê 25ê Teşrîna Peyêne Roja Têkoşînê Mîyanneteweyî ya Vera Şîdetê Cinîyan dest bi kampanyaya yewserrîye kerd.
Komîteya Cinîyan a Rayberîyanê Herêmkîyan yê DEM Partî, munasebetê 25ê Teşrîna Peyêne Roja Têkoşînê Mîyanneteweyî ya Vera Şîdetê Cinîyan bi sloganê "Vatişê ma nêqedîyayo, ma do pîya şîdetî vindarnê" dest bi kampanya kerd ke do yew serre dewam biko. Deklare ke Koşkê Cemîl Paşayî de ame viraştene, tede Hemşaredara Şaredarîya Amedî ya Şaristanê Girdî Serra Bucak û hemşaredarê cinî yê şaredarîyanê bînan beşdar bîyî.
Deklareyê tirkî Hemşaredara Şaredarîya Batmanî Gulîstan Sonuk ke qeyyûm ameyo tayînkerdene û yê kurdkî zî Hemşaredara Şaredarîya Mêrdînî ya Şaristanê Girdî Devrîm Demîr ke qeyyûm ameyo tayînkerdene, wend.
Hemşaredara Şaredarîya Batmanî Sonuk ke dîyar kerd şîdetê cinîyan, bi cîyakerdişê cinsîyetî têkilîdar o û problemêko komelkî yo ke hukmatê pedeerşahî werdeno û xorîn keno, aye bale ant ser ke şîdeto sîstematîk rasterast tesîrê cinîyan keno. Sonuk bale ant ser ke wexto ke şîdet, tecawuz û îstîsmarê cinîyan û tutan roj bi roje zêde beno, vera naye ne tedbîrê pawîtişî û ses yenê girewtene ne zî cinî mekanîzmayanê pawîtişî ra yenê dûrvistiş.
'Ma dest bi kampanyaya hempare kenê'
Sonuk ke qeyd kerd rayberîyê herêmkî şênê bi hawayêko hîna girewtox û aktîf rayberîya merkezî piştî bidê seypêyîya cinsîyetê komelkî, derheqê kampanya de nê çîyî vatî:
"Ma nê perspektîfî reyde, emser 25ê Teşrîna Peyêne Roja Têkoşînê Mîyanneteweyî ya Vera Şîdetê Cinîyan de sey Polîtîkayanê Cinîyan ê Şaredarîyanê DEM Partî dest bi kampanyaya hempare kenê. Na kampanya ke do yew serre dewam biko, do temîn biko ke ma vera her tewir tehdayê pederşahî ke nê welatan de wazenê nasname, îrade û xoverdayîşê cinîyan vindî bihesibno, zeminêko bihêz û organîzekerda de vinderê. Ma do vera polîtîkayanê pederşahî ke cinîyan vindî hesibnenê, vengê xo berz bikê û ma do têkoşînê vera şîdetê cinîyan gird bikê! Na kampanya eynî wext de do zemîn virazo ke rayberîyê herêmkî xizmetê şaredarîyê komelhesî yê cinîyan xurt bikerê û na çarçewa de seba ke stargehê cinîyan, merkezê mişewreyê cinîyan û mekanîzmaya piştîya huqûqî bêrê afrinayene, rolêko muhîm bigîrê xo ser û çareyanê bingeyînan bivirazo. No têgêrayîş, do rayberîyanê herêmkîyan de zî waştişê cinîyan bîyaro çiman ver, xoverdayîşê kolektîfî ya cinîyan xurt biko.”
