Şaredarîya Amedî ya Bajarê Girdî, aşma Êlule de sînema û tîyatroyê bêheqî û Dengbêj û konsêran organîze kena.
Çalakîyê aşma Êlule ke Serekîya Daîreya Kulturî û Karanê Sosyalan virazena, Merkezê Kultur û Kongreyî yê ÇandAmedî de dest pêkenê. Heme sînema û tîyatroyê bêheqan reyde Dîwanê Dengbêjan û konsertî saete 19.30î de dest pêkenê.
Di Nawberê de
Teqwîmê çalakîyan 14ê Êlule de bi filmê "Di Nawberê de" yê ke Ali Kemal Çinarî anto, dest pêkeno.
Elif Ana
Filmê "Elif Ana" yê xelatgirewteyî ke Kazim Öz û Semir Aslanyurekî anto, tede behsê karakterêka kerametine ke şêna ameyoxî bivîna, û prosesê sîyasî yê Tirkîya yo nezdî yeno qalkerdene, 15ê Êlule de do bêro temeşakerdene.
Şaredarîya Şarsitanê Girdî perdeyanê xo akena
20ê Êlule de Tîyatroyê Bajarî yê Şaredarîya Bajarê Girdî ya Amedî do perdeyanê xo bi adaptasyonê Kurdkî yê romanê namdarî Don Kîxotî yê Cervantesî akero. Êyê ke kayî ra manenê do 27-28ê Êlule de zî reyna şansê temaşekerdişî bivînê.
Filmê Biryareke Zor
Filmê "Qerarêko Çetin" (Zor Bir Karar) ke Ender Ozkahramanî senaryoyê ey nuşto û anto, behsê cinîyêk keno ke Colemêrgî de cayê viraştişê xalîyan de xebitîyena û pereyê ke arê dana, wazena pê amelîyatê pirnike bikera la xo mîyanê hedîseyanê cîya-cîyayan de vînena. Filmê ke Şukran Aktî û Feyyaz Dumanî rolê serekeyî de kay kenê do 21ê Êlule de bêro tamaşekerdene.
Pîrebok
Filmê "Pîrebok" ke Lutfî Îrdem û Nurullah Kaya pîya nuşto û Îrdemî anto, do 22ê Êlule de bêro temaşekerdene. Film behsê cuya camêrdêkê feqîr û xuz Ademî keno ke seba ke xo rê aîleyêk awan bikero keweno dima efsaneyê Pîrebokî ke domantîya xo de ey rê qal bîya. Sewbîna fîlm behsê cinîyêke kena ke kênaya xo reyde eşkaya weş bimana û remaya şîya welatêkê cîranî.
Dîwanê Dengbêjan
Mîyanê çalakîyan de dîwanî zî ca gênê ke temsîlkarê tewr muhîmî yê kulturê fekkî, dengbêjî organîze kenê. Dîwanê Dengbêjan do 24ê Êlule de Parkormanê Kayapinarî de bêro viraştene.
Vîrameyîşê Ke Kerra Ser O Nusîyayî
Filmê "Memories On Stone" (Vîrameyîşê Ke Kerra Ser O Nusîyayî) ke Shavkat Amin Korkî anto û Hussein Hassan û Nazmi Kirikî tede rolê serekeyî kay kerdo do 28ê Êlule de bêro temaşekerdene.
Gênco
Filmê "Gênco" ke Ali Kemal Çinarî nuşto, anto û kay kerdo û 28. Festîvalê Mîyanneteweyî yê Fîlman yê Anqara de layiqê xelata tewr weş ê filman ameyo dîyene, mîyanê çalakîyan de yo. Ali Kemal bi hêzanê superî yê ke domantîya xo de ey rê dîyayê waşto ke merdimê dormaleyê xo rê hetkarî bikero la seba ke hêzê ey sinorkerde yê ge-ge keweno zehmetîya. Ali Kemal ke embazanê xo reyde kafeyêkê vejeteryan xebitneno, sey qehremanêkê superî nameyê Gênco şuxulneno, maske û pelerin dano xo ra, rojêk Salih yeno hetê ey. Gênco wextê xo de hetkarîya Salihî kerda û nika ganî hetkarîya waya ey biko. Film do 29ê Êlule de merkezê kongreyan de bêro vînayene.
Konsêr
Çalakîyê aşma Êlule bi konsêrêkî qedîyenê. Konsêro ke 29ê Êlule de Meydanê Berê Koyî de yeno viraştene, tede Kardeş Turkuler û grûba Hevra do vejîyê sahne ser.