Gelo Ocalan veradîyeno? Kamî/e nê nerheqî de se vat?
Serekê MHPyî Devlet Bahçelî ewro va ke, wa Serekê PKK Abdullah Ocalan bêro parlamentoyê Tirkîya de, kombîyayîşê DEM Partî de qisey bikero.
Munaqeşeyê "prosesê newe yê çareserîye" ser, badê ke Devlet Bahçelî venga Ocalanî da, hîna germ bîy.
Devlet Bahçelî ewro zî kombîyayîşê partîya xo de na mesela ser qisey kerd û va "Wa Ocalan bêro parlamento de qisey bikero."
Bahçelî îzah kerd ke ê seba eştişê tay gaman rê amade yê û va:
"Eger mesela sîyaset, welat û yew vîyarteyê bê teror ser her kes pîya bibo, ma amade yê ke destê xo binê kerra kerî."
Bahçelî wina va, wa tecrîdê Abdullah Ocalanî wedarîyo, wa kombîyayîşê DEM Partî de qisey bikero û venga bido ke PKK bi temamî qedîyayo û rêxistin meydan ra wedarîyayo.
DEM Partî se vat?
Hemsereka Pêroyî ya DEM Partî Tulay Hatîmogullarî cewab da Bahçelî û va "Tecrîdî wedarê û wa Rêzdar Ocalan qisey bikero."
Serekê MHPyî Devlet Bahçelî kombîyayîşê grûba partîya xo de vatbi "Wa Abdullah Ocalan parlamento de, kombîyayîşê DEM Partî de qisey bikero."
"Wa Rêzdar Ocalan vejîyo û qisey bikero"
Hemsereka Umûmî ya DEM Partî Tulay Hatîmogullarî zî kombîyayîşê grûba DEM Partî de cewabê vateyê Bahçelî da û wina qisey kerd:
"44 serrî yo ke tecrîd dewam keno. Bi serran o ma mucadele kenî ke tecrîdê Rêzdar Ocalanî wedariyo.
Ganî tecrîd wedariyo. Ya, wa tecrîd wedariyo. Wa Rêzdar Ocalan vejîyo û qisey bikero û ma bivînî gelo do se vajo."
CHP se vana?
Serekê Umûmî yê CHPyî Ozgur Ozel cewabê vengdayîşê Bahçelî yo Ocalan rê da û va "Rêzdar Devlet, ez zî dewlete teklîf kena Kurdan rê."
Serekê Umûmî yê CHPyî Ozgur Ozel zî kombîyayîşê grûba partîya xo de va "Rêzdar Devlet, ez zî dewlete teklîf kena Kurdan rê. Bênê ma pîya Kurdan bike wayîrê dewleta Tirkîya"
