Hemşaredarê Şaredarîya Amedî ya Bajarê Girdî Serra Bucak û Dogan Hatunî, mezelê Narîn Guran ke Gorîstanê Mehla Tavşantepeyî de ameya defnkerdene zîyaret kerd û vilî ronayî.
Hemşaredarê Şaredarîya Amedî ya Bajarê Girdî Serra Bucak û Dogan Hatun, Hemsereka Pêroyî ya Partîya Seypêyî û Demokrasî yê Şaran (Partîya DEM) Tulay Hatimogullarî, parlamenterê Partîya DEMî, hemşaredarê şaredarîyanê qezayan, Hemserekê Partîya DEMî yê Amedî Gulşen û Abbas Şahîn û rayberê partî mezelê Narîn Gurana 8 serra ke heqê cuya aye ameyo binpakerdene, zîyaret kerd.
Hemşaredaran mezelê Gurane ke Mehla Tavşantepeyî ya girêdayeya qezaya Baglarî de yo, zîyaret kerd, dua wendî û vilî ronayî.
Hemsereka Pêroyî ya Partîya DEMî Tulay Hatimogullarî, beyanatê xo de va ke înan 19 rojî xeberêka weşe ya Narîne pawita la xebera xirabe girewta.
Hatimogullari wina qisey kerd:
"Domanî helbet ameyoxê nê komelî yê, elbet wezîfeyê pîlan, wezîfeya komelî ke cayêk peyda bikero ke tede domanî bi keyf perwerde bivînê, bi keyf kay bikerê. Seveknayîşê domanan wezîfeyê raya pêroyî yo, wezîfeyê raya pêroyî yo ke qanunanê ke domanan seveknenê, ser o îsrar biko. Wezîfeyê raya pêroyî yo ke yew nizamê komelî birono ke tede domanî biciwîyê û maruzê îstîsmarî nêbê û wezîfeyê ma pîlan o ke komelêko winasî virazo. Domanî ameyoxê nê komelî yê la reyna eynî wext de domanî sey doman zî, ê serranê domantîya xo de zî subjeyê nê komelî yê, parçeyê nê komelî yê."
Hatimogullarî dîyar kerd ke ê heta peynî do dewa taqîb bikê û wina dewam kerd:
"Heta ke nê erdî de qet yew doman maruzê îstîsmarî nêmano, heta ke şîdeto ke hemê domanan ser o yo, nêwedarîyo, heta ke ma nê welatî de domanan rê cayêk peyda nêkê ke tede sey domanan bi raştî keyf bikerê, parkanê kayî de azad kay bikerê, ma do têkoşînê xo dewam bikerê."