Tepiştiş Serekê Şaredarîya Girde ya Stenbolî (ÎBB) Ekrem Îmamoğluyî ra dima, bi seyan kesî Dêrsim de ameyî têhet û yew rayşîyayîş kerd.
Reaksîyonê vera qerarê girewtişê Serekê Şaredarîya Girde ya Stenbolî (ÎBB) Ekrem Îmamoğluyî dewam kenê. Dêrsim de, bi seyan kesî ke verê Serektîya Bînaya CHPyî de kom bîyê protesto kerde. Xeylê kesê ke mîyanê înan de temsîlkarê zaf partîyanê sîyasîyan û rêxistinanê komelê sivîlî estbî, hetanî Meydanê Seyid Rizayî şîy. Rayşîyayîş de sloganÊ "Hukmat îstîfa", "Heq, hiqûq, edalet", "Bi xoverdayîş ma do ser bikewê" ameyî vatene.
Rayşîyayî ra dima, parlamentera DEM Partî ya Dêrsimî Ayten Kordu, Serekê bajarî yê CHPyî Kemal Özcan, Serekê bajarî yÊ EMEPî Ergin Tekin qiseykerdiş kerdî.
Parlamentera DEM Partî ya Dêrsimî Ayten Kordu wina qisey kerd:
"Ez wazena reyna vajî ke ma no gasibkerdişê heqan, na hişmendîya darbeyî ke Wanî ra heta Colemêrgî, Colemêrgî ra heta Dêrsimî, heta Stenbolî derg bena, nê meydanan de şermezar kenê, ma do demokrasî û seypêyî nê erdan de pîya awan bikerê û no awankerdiş do hemê şaran reyde bo. Ganî Ekrem Îmamoğlu û embazê ey ke ameyê girewtene ca de bêrê verdayene. No qerar darbe yo."
