Odaya Sanayî û Bazirganî ya Amedî hewteyê bêro Enqere de zîyaretê heme rayberîyanê partîyanê sîyasîyan bikê
Serekê DTSOyî Mehmet Kaya dîyar kerd ke ê hetkarîya prosesê çareserkerdişê problemê kurdan kenê û va: "Ma do sey temsîlkarê dezgeyanê sîvîlan, hewteyê bêro Enqere de partîyanê sîyasîyan reyde pêvînayîşan bikê."
Serekê Odaya Pîşesazî û Bazirganîya Amedî (DTSO) Mehmet Kaya, pêvînayîşê heyetê Îmralîyî û mesajê ke raya pêroyî rê ameyê dayene, nirxnayî.
'GAMÊ POZÎTÎFÎ'
Kayayî ard ziwan ke Tirkîya serranê 2013-2015î de zî prosesêkê "aştî" dîyo, labelê prosesî sey yewbînî nîyê û va ke seba prosesêko newe "destpêkêko raşt" ameyo kerdene. Kaya da zanayene ke xeletîyanê verênan û rîskanê nehesabkerdeyan yê nê prosesî de waşto ke metodêk bêro viraştene û va: "Tîya de Devlet Bahçelî seba ke lîderêko bi bawerîya neteweperestan o û Abdullah Ocalan zî rayberêk o ke kurdî bawerî pê anê, şik û gumanê merdiman mîyan ra darîyenê we. Nê gamê pozîtîfî yê."
Kayayî Ajansa Mezopotamya rê qisey kerd û da zanayene ke xeletîyanê prosesê "çareserîye" ra teber seba ke xeletîyê neweyî nêrê kerdene, ganî raya raşte bêro viraştene û va ke ganî partîyî prosesanê winasîyan de verba hêza zêde nêkewê. Kaya ard ziwan ke nêzîkatîyê sey "Ez bi hêz a, ez do her çî bikerî. Ganî şima ca bîyarê" do zerar bido prosesî û va: "Ma serra 1999î de tam no çî dî. Ganî AKP û MHP xo naye ra dûrî bifinê. A serdemî de wesayetê dewlete û leşkerî zî bi qasê ke muzakere yenê kerdene, ganî babeta bêparkerdişê herême û problemanê aye de zî gamî bêrê eştene, danûstendinî zêde bibê. Eke nê bêrê kerdene, do komel hetkarîya prosesî û muzakereyan biko."
'GANÎ MECLÎS BÊRO XURTKERDIŞ'
Kaya destnîşan kerd ke herême de seba prosesê ke qewimîyeno tersî estê û dîyar kerd ke sebebê naye yew problemê ekonomîkî yê herême yê û yo bîn zî polîtîkayê ke vera kurdanê herêmanê sînorî de yenê meşnayene bi xo yo. Kaya hişyarî da ke eke gamê raştî nêrê eştene do hetkarîya prosesî kêm bibo û va: "Nika pêvînayîşî zaf pozîtîfî yê. Bêprobleme dewam kenê. Tîya de helwesta kadroyanê DEM Partîye ya ke prosesî meşnena zaf muhîm a û dîyarker a. Labelê ganî tîya de Meclîs bêro xurtkerdiş."
Kaya destnîşan kerd ke ganî dezgeyê sîvîlî yê ke do hetkarîya partîyanê sîyasîyan bikê zî tevlî prosesê Meclîsî bibê.
Kaya da zanayene ke ganî proses raşt bêro meşnayene û va: "Munaqeşe û daxuyaniyan de cayê dezenformasyonî de wa ziwanêk bêro şuxulnayene. Ganî yewbîyayîşê kurd û tirkan o ke ewro ameyo dîyarkerdiş raşt bêro kerdiş. Tena vatişê 'ma bira yê' û 'ma kurdan ra hes kenê' bes nêkeno. Tirkîya zî herêmanê ke kurdî tede ciwîyenê de; ganî vera heq û azadîyanê bingeyînan yê Iraq, Sûrîye û Tirkîya de tevger bêro viraştene. Coka ma nê pêvînayîşan rê hetkarî kenê. Ma do sey Platformê Pawitişî û Hetkarîya Şaristanê Amedî hewteyê bêro Enqere de zîyaretê heme rayberîyanê partîyanê sîyasîyan bikê."
