Konserê Kardeş Turkulerî û Hevra bîşewe Meydanê Şêx Seîdî de ame dayîş û bi hezaran kesî semedê deyîranê Kurdkî ameyî têhet.
Konser hetê Şaredarîya Şaristanê Girdî ra Meydanê Şêx Seîdî (Berê Koyî) de bi beşdarîya grûbanê Kardeş Turkulerî û Hevra ame dayîş.
Hemşaredarê Şaredarîya Şaristanê Girdî Dogan Hatun, temsilkarê partîyanê sîyasîyan û rêxistinê sivîlî zî beşdarê konserî bîyî.
Hemşaredar Hatun: Deyîrê ma kêmî nêbê
Hemşaredar Dogan Hatunî verê konserî de qisey kerd û va "Ma vatbî ma do bêrê, hayo ma ameyî Amed. Şima sere û çimanê ma ser ameyî" û sîlam da şarî. Hatunî wina dewam kerd: "Ma vatbî, tayê do şêrê, ma do bêrê. Ma reyna ameyî. Nê cayî reyna cayê ma yê. Deyîrê ma, kulturê ma, ziwanê ma cayanê ma ra kêmî nêbê." Hatunî wina dewam kerd: "Ma kulturê xo rê wayîr vejîyê, ziwanê xo, hunerê xo, herra xo û awa xo. Azadîya ma ma pawena. Nê cayî çiqas zêde pirr bibê ma do hende azadîye û aramî bivînê."
Badê qiseykerdişan Grûba Hevra ame sahne, îzeh kerd ke ê tehdayê ke ziwanê kurdkî ser o benê, neheq vînenê û bi deyîranê kurdkî yê ke vatî, şar zaf keyf kerd.
Solîsta Kardeş Turkulerî Feryal Oney zî wina va: "Unzîle, Guldunya, Ceylan, Cemîla ke dolaba cemedî de ameye vindarnayene û nika Narîn û zaf nameyê bînî. Ma nê nameyan tena deyîran de nê, ma wazenê cuya înan dewam bikerê. Ma êdî nêwazenê seba înan yas bikerê, ma wazenê înan reyde deyîran vajê."
Her ziwanî ra deyîrî ameyî vatene, govend ame girewtene
Cinîyan, ciwanan, domanan konserê bêheqî de Hevra û Kardeş Turkulerî reyde her ziwanî ra deyîrî vatî û govend girewte.