Serekê Beledîyeya Dîyarbekirî yo verên û sîyasetmedarê Kurd Osman Baydemîrî veng da Partîyanê Rojavayê Kurdîstanî û va: "Baw û Kalikanê ma 100 serrî verî bi vatişanê Anqara Xapîyayî, Labelê ganî ma nêrê xapîmayîş "

Badê ke Heyeta Tehrîr El Şamî kewtê paytextê Sûrîye Şam, sibarojê Sûrîye û Rojavayê Kurdîstanî yeno munaqeşekerdiş û meraqkerdiş.

Rijîyayîşê rejîmê Beşar Esedî ra dima heyete Amerîka û Fransa seba viraştişê yewitîya kurdan resayê Rojavayê Kurdîstanî û partîyan dir dest bi kombîyayîşan kerdî.

Sîyasetmedarê kurd Osman Baydemîrî îzah kerd ke, Tirkîya wazena kurdî nêbê wayîrê statuyî û veng da partîyan:

Baydemîr Ajansê Rûdawî bi mêmanê Dilbixwin Darayî û nê çîyî vatî:

"Ez partîyanê Rojavayê Kurdîstanî ra wazena ke wa tarîx ra şîretan vejî. Çîyanê ke ameyê sereyê baw û kalikanê ma ra şîretan vejî. Cuya Qazî Mihemedî ra şîretan vejî, dersan bigîrê. Ganî ma pîya heqê kedê miletê xo bidî.”

Heyeta Tehrîr El Şamê (HTŞ) 8ê Kanûna Verêne ya 2024î de Şamê paytextê Sûrîye kontrol kerd û peynî ame hukmatê Beşar Esedî.

Badê ke rejîmê Esedî rijîya, Tehrîr El Şamê zafaneyê Sûrîye kontrol kerd û yew hukmatê muweqetî yo ke seba 3 aşman viraşt.

Tayê nuqteyê muhîmî yê ke Sîyasetmedarê Kurd Osman Baydemîrî ardî ziwan nê yê:

"Ez partîyanê Rojavayê Kurdîstanî ra wazena ke tarîx ra şîretan vejî.

Eke amanc statuyê Kurdîstanî bo çi problemî çin ê ke partîyî ser o pê nêkewî.

 Nika destê Anqara Sûrîye de esto. Mi rê ferqê çi partîyanê Kurdîstanî çin o.

Anqara bi çimê yew cenaze ra Sûrîye ra nîyadana û wazena parê xo bigîro.

Anqara wazena kurdî nêbê wayîrê statuyî.

Enqera fikirîyena ke înan Başûrê Kurdîstanî de yew xeletî kerda û ganî rayîr nêdo ke Rojavayê Kurdîstanî de zî eyno çî bibo.

Çîyanê ke ameyê sereyê baw û kalikanê ma ra şîretan vejî. Cuya Qazî Mihemedî ra şîretan vejî, dersan bigîrê. Ganî ma pîya heqê kedê miletê xo bidî."