ZAZAKÎ NEWS - Partîya Şarî ya Komarî (CHP) vizêr Kongreya xo ya Pêroyî ya 21ine organîze kerd û Ozgur Ozel reyna sey Serekê CHPyî ame weçînayene. Ozel bi hezar û 171 rayan ame weçînayene.
Seke yeno zaznayîş, îhtîmalê betalkerdişê kongreya verêne ya CHPyî û tehlûkeyê tayînkerdişê qeyûmî estbi.
Naye ser o qerar amebi dayene ke CHP 6ê Nîsane de kongreya îstîsnayî organîze bikero û serekê newe yê partîyî biweçîno.
Kongreya CHPyî vizêr saete 10:00 de Merkezê Kulturî yê Nazim Hikmetî yê Anqera de dest pêkerd.
Serekê Şaredarîya Qezaya Muratpaşayî ya Antalya Umit Uysal verê destpêkerdişê kongreyî namzedîya xo peyser ant û Parlamenterê verênî yê CHPyî Berhan Şimşek zî seba ke muracat de erey mend nêeşka bibo namzed.
Kongre de hezar û 276 delegeyan ray da û hezar û 171 kesan raya xo da Ozgur Ozelî. 105 rayî zî ameyî betalkerdiş.