ZAZAKÎ NEWS - Pakêta seba hepsîyan ya 10ine, ya ke 30 madeyê ci estê û 9 qanûnan de bedilnayîşan pêşnîyaz kena, Parlamentoya Tirkîye de ya. Pêşnîyazê "bedilnayîşê ceza" ya ke hetê Wezaretê Edeletî yê Tirkîye ra ameyo amadekerdiş, pêşkêşê Serekîya Parlamentoya Tirkîye ame kerdiş.
Serekê Grûba AK Partîyî Abdullah Gulerî Parlamento de, yew konferansê çapemenî de derheqê pakête de qisey kerd.
"No destpêk o, Ma do bidomnê"
Gulerî vat ke înan paket teslîmê Serekîya Parlamentoyê kerda û do rojanê ameyeyan de pêşnîyazê qanûnî bêrê Komîsyona Edeletî.
Abdullah Gulerî vat: "Ma do paketanê cîya-cîyayan bîyarê rojeve. No pêşnîyazê qanûnî destpêk o, ma do bidomnê."
Goreyê zanayîşan, Pakêta Edeletî ya 10ine, ya ke hetê AK Partîyî ra ameya pêşkêşkerdiş, do 31ê Gulane de Komîsyona Edeletî de ser o bêro qiseykerdiş.
Paket ser o do 31ê Gulane de saete 16:00 de Komîsyona Edeletî de bêro qiseykerdiş.
DEM Partîyî waştêne ke seba tayê hepsîyyanê sîyasî û hepsîyanê nêweşan, mîyan de hemserekê verê yê HDP Selahattîn Demîrtaş zî esto, bedilnayîş bêro kerdiş.
Wezîrê Edeletî yê Tirkîye Yilmaz Tunçî derheqê pakête de vat: "Pakêta Edeletî ya 10ine do sîstemê ceza hîna xurtir bikero, têkoşînê vera sûcan bîyyaro ca, verê sûcan bigîro."
Goreyê vatişanê Gulerî, do 19 hezar û 800 hepsî na pakête ra îsîfade bikerê.
