ZAZAKÎ NEWS - Endama Heyeta Îmralîyî ya DEM Partî Pervîn Buldan paştî da vengdayişê Serekê MHPyî Devlet Bahçelî ke vatibi wa parlamento de komîsyon bêro ronayene.
Endama Heyeta Îmralîyî û Parlamentera DEM Partî Pervîn Buldan ewro derheqê qerarê qedênayişê şerê çekdarî û xofesixkerdişî yê PKKyî de qisey kerd.
Serekê MHPyî Devlet Bahçelî seba averşîyayîşê prosese çareserî vizêr waştişê ronayişê yew komîsyonî yê 16 partîyanê parlamentoyî kerd û 7 pêşnîyazî kerdî.
Pervîn Buldane eşkera kerd ke ê bi temamî sey Devlet Bahçelî fikrîyenê û va:
"Ma verî zî eşkera kerdibi ke adresê çareserî parlamentoyê Tirkîya yo. Ma paştî danê pêşnîyaranê Bahçelî."
Pervîn Buldane wina va:
"Bahçelî çîyo ke lazim o va. Ma zî vatibi na mesela de cayê çareserî parlamento yo.
Ronîyişê komîsyonî reyde do rewşe zelal bibo. Babeta komîsyonî de fikrê zafaneyê partîyanê sîyasîyan yew o û bê ke erey bimano ganî AK Partî zî fikrê xo eşkera bikero.
CHP zî vana wa komîsyon bêro ronîyayîş. Babacan û Davutoglu û zafaneyê partîyanê sîyasîyan eynî çî vanê.
Coka ganî reye nêkewo. Parlamento heta 15ê Temuze gureyeno. Heta ê demî ganî komîsyon bêro ronayene."
Serekê Parlamentoyê Tirkîya Numan Kurtulmuş zî eyni rojî de derheqê ronîyayîşê komîsyonî de vatibi "Ez bawer kena ke heta amnan no proses do biqedîyo."
"Wa komîsyon bêro ronayene"
Serekê MHPyî Devlet Bahçelî vizêr yew beyanatê xo de pêşnîyaz kerdibi ke vengdayişê Serekê Parlamentoyê Tirkîya reyde "Komîsyona Yewitî û Hemkarîya Neteweyî" bêro ronayene.
