Platformê Pawitişê Bajarî yê Amedî kafeyê Hewş û Karga yê ke nê rojan de rastê hêrişî amebî zîyaret kerd. Platform vano ke “Ma do destûr nêde wa nê hêrişî zirar bidê kultur û cuyayîşê bajarî.”
Platformê Pawitişê Bajarî yê Amedî verî ke kafeyan zîyaret biko, kuçeyê kafeyan de beyanatêk da çapemenî.
Temsîlkarê sazîyan ê ke girêdayîyê platformî yê, Hemserekê Şaredarîya Girdî ya Dîyarbekirî Serra Bûcak û Dogan Hatûn, Parlamentera DEM Partî ya Amedî Edalet Kaya û hemşaredarê qezayan û xeylê kesê bînî beşdarê beyanatê çapemenî bîyî.
Hemsereka Şaxa SESî ya Amedî Yildiz Ok Orak nameyê Platformî ser o beyanat wend.
Beyanatê platfomî de wîna vajîya:
“11ê na aşme de Mîyanê Sûrî de 2 cayî rastê hêrişê bi çek û bombeyanê vengî ameybî. Badê zî ame musayîş ke tay kesî kinc û cuyayîşê tay kesan ra aciz bîyê, verê cû wayîrê kafeyan tehdîd kerdê, badê zî hêrişê kafeyan kerdê.
Ma çi rey hêrişanê fizîkî û fekkî yê vera cayanê tîcaretî qebûl nêkenê. Nê hîrîşî zirar danê aşitîya cimatî, kultur û cuyayîşê hempîya yê bajarê ma. Ma qebûl nêkenê û şermezar kenê.
Ma sey Platformê Pawitişê Bajarî yê Amedî wazenê wa derheq'ê nê kesan de tehqîqatêko hîra bêro akerdiş, kesê sûcdarî bêrê cakerdiş û vernîya nê tewr hêrişan bêro girewtiş. "
Enwer Yılmaz / Zazakî News
