Platformê Ziwanê Kurdkî seba dewrê neweyî yê perwerdeyî beyanat da û va, gedeyê kurdan do reyna rastê asîmîlasyonî bêrê û va: "Heta ke Kurdkî bibo ziwano resmî û ziwanê perwerdeyî, têkoşînê ma do dewam bikero."
Ewro înê, 6ê Êlula 2024î, Platformê Ziwanê Kurdkî derheqê dewrê perwerdeyî yê 2024-2025î de Cemîyetê Rojnamegeranê Başûrrojhelatî de beyanat da.
Rayberê partîyanê sîyasî û temsilkarê rêxistinanê cemîyetê sivîlî zî beşdar bîy. Beyanat hetê Vervatoxê Platformê Ziwanê Kurdkî Şerefxan Cizîrî ra ame wendiş.
Beyanat wina yo: "9ê aşma êlule de dewrê perwerdeyî yê serranê 2024-2025î Tirkîya û vakurê Kurdistanî de dest pêkeno. Seba gedeyanê kurdan no roj hem rojêko dilşayîye yo û hem zî rojêko xemgînîye yo. Çunke emser zî tutê kurdan vakurê Kurdistanî de bi Ziwanê Kurdkî perwerde nêvînê. Tutê ma do reyna bi prosesêko zor yê asîmîlasyonî ra ribiri bimanê. No zî bi raştî zulm o, zor o, hedîseyêko nêînsanî yo û çi dîn û bawerîyan de zî nêno qebulkerdiş. No, ne goreyê heq û psîkolojîyê gedeyan o û ne zî goreyê rastîyanê pedagojîkan o.
Domananê kurdan reyna bi ziwanê xo nêwanê û asîmîlasyon reyna dewam keno.
Sîyaseto resmî derheqê ziwanê kurdkî de dirîtî keno.
Komare ra nata zêdeyê 100 serrî yo ke gedeyê kurdan bi ziwanê xo nêwanenê.
Heta ewro zî dewlete qey ziwanê kurdkî sazîyê awan nêkerdo.
Sazîyê ke xebata ziwanê kurdkî kenê, yênê qedexekerdiş."
Platformî vato ke heta ke kurdkî nêbo ziwano resmî û ziwanê perwerdeyî, têkoşînê înan do dewam bıkero.
Enwer Yilmaz / Zazakî News
