Meclîsê Şaredarîya Amedî ya Şaristanê Girdî, raporo ke Komîsyonê Kulturî amade kerdo ke seba standardîzekerdişê çekuyanê meslegî yê Kurdkî yê ke şaredarîyan de zaf yenê şuxulnayene, qebul kerd. No teklîf verê cû kombîyayîşo normal ê aşma Temmuze de sey pêşnîyaz amebî qebulkerdene.
Nêame aşkerekerdiş ke na xebate de ca bidîyo Zazakî zî yan ney.
Meclîsê Şaredarîya Şaristanê Girdî, roniştişo xo yo verên yê kombîyayîşê normalî yê aşma Tebaxe Salona Meclîsê Şaredarî de viraşt. Kombîyayîş bi serdarîya Cagira Serekîya Dîyine yê Meclîsê Şaredarîya Şaristanê Girdî Evîn Yelboga virazîya û endamê meclîsî zî beşdar bîyî.
Meclîsî, madeyanê rojeve ser o munaqeşe kerd û raporê Komîsyonê Kulturî ser o vindert. Peynî de, Meclîsî bi reydayîş qebul kerd ke Şaredarîya Amedî ya Şaristanê Girdî do rayberî biko û seba ke nameyê beşanê xîzmetî bibê wayîrê termînolojîyêka hempare, "Komxebeta Viraştişê Termînolojîya Hempare ya Kurdkî" bido organîzekerdene.
Do pisporê ziwanî beşdarê komxebate bibê û encamê komxebate Şaredarîya Amedî ya Şaristanê Girdî de sey yew ceribnayîşê pîlotî bêro destpêkerdene.
