Şîrketê teknolojî yê Amerîkayij Microsoft, aplîkasyonê Skype ke xizmetê têkilîya vengî û vîdyoyî pêşkêş keno, heta aşma gulane biqefelno. Şîrketî va ke, do xebata xo Microsoft Teams ser o bikerê.
Serekê Aplîkastonî û Platforma ke hemkarê Microsoftî yo Jeff Teperî blog nuşteyê xo de derheqê na mewzû de yew nuşte nuşt û da zanayîş ke aşma gulane de do Skype wedarnê û xebata xo Microsoft Teams ser o bikerê.
Teperî îfade kerd ke bi aplîkayonê Teamsî, xebitnayoxî bieşkê zafê xusûsîyetanê bingehînan ê Skype ra zî îstîfade bikerê. Xusîyetanê neweyan de sey têkilîya vengine grûban reyde, mesaj erşawîtiş û parekerdişê dosyan, îdarekerdişê tekqwîmî û afirnayîşê komunîteyan estê.
Teperî îşaret kerd ke ewro ra mîlyonan kesî dest bi xebitnayîşê Teamsî kerdê û 2 serranê peyênan de deqîqayê ke xebitnayoxê kombîyayîşanê Teamsî de vîyarnayê 4 qatî zêde bîyo.
Skype ke 2003 de hetê Janus Friis û Niklas Zennstrom ra ame ronayîş, seba ke însanan rê îmkanê qiseykerdişê bêpere înternetî ser o daybî, bale antbi xo ser.
2005 de hetê eBayî ra bi 2.6 mîlyar dolarî amebi erînayîş. Skype serra 2011 de hetê Microsoftî ra bi 8.5 mîlyar dolarî amebi erînayîş.
Nika fehm beno ke Skype do bêro padayîş û herinda eyde aplîkasyonê Teams bêro vilakerdiş.
