Mabênê 30ê teşrîne û 8ê kanûne de pê hemkarîya DTSO û TUYAPî, Dîyarbekir de fûarê kitaban yeno viraştiş.
Odaya Sanayî û Tîcaretî ya Dîyarbekirî (DTSO) û TUYAP, badê 5 serran, mabênê 30ê teşrîne û 8ê kanûne de fuarê kitaban virazenê.
Şirîkan, seba fuaro ke Merkezê Fuarî û Kongreyê Mîyanneteweyî yê Mezopotamya de yeno viraştene, ewro Dîyarbekir DTSO de kombîyayîşê lansmanî virazîya.
Serekê DTSOyî Mehmet Kaya, Mudirê Pêroyî yê TUYAPî Îlhan Ersozlu, Serekê Yewîya Weşangeranê Tirkîya Kenan Kocaturk, Yewîya Weşangeranê Kurdan (YEWKURD), temsîlkarê PENa Kurdî û Komîsyonê Fuarî yê DTSOyî beşdarê kombîyayîşî bîy.
Kaya kombîyayîş de va ke serra 2005 ra heta nika xebatê xo domnenê ke Dîyarbekir bibo merkezê fuarî. Kaya îfade kerd ke serra 2008 de pa TUYAPî yew peyman îmza kerdo û nê peymanî reyde karê fuarî de aver şîyê. Serra 2024 de ma do pê TUYAPî fuarê kitaban virazê. No fuar do bibo yew fuarê tewr muhîm yê herême.
