Tornê Şêx Seîdî Qasim Firat derheqê heqaretanê ke Rêberê Kurdan Şêx Seîdî rê bîyê de va, "No heqaret şexsê Şêx Seîdî de heme kurdan rê bîyo."
Ardimkarê Mudirê Pêroyî yê BELTAŞa Şaredarîya Bajarê Girdî ya Enqera ya CHPyî Alparslan Yilmazî, boyêka erebeyan ya ke resmê Şêx Seîdî ser o bî odaya xo de aleqna û medyaya komelkî ser ra pare kerd.
Yilmazî parakerdişê xo de va "Seîd ofîsê ma de cayo ke heq keno de dardekerde yo."
Tornê Şêx Seîdî Qasim Firat bî mêmanê bultenê Rûdawî û behsê armancê nê heqaretan kerd.
"Ganî rayedarê kurdan bêveng nêmanê"
Qasim Firatî dîyar kerd ke no heqaret şexsê Şêx Seîdî de heme kurdan rê bîyo û va, "Ganî rayedarê kurdan bêveng nêmanê."
Firatî nîşan kerd ke Şêx Seîd seba kurdan sembol o û va, "Ezîzê mi, Şêx Seîd sembol o. Werişt va, 'Ma estê'."
"Çiqas seba kurdan gamê pozîtîfî yenê eştene nê vejîyenê meydan"
Qasim Firatî bale ante demê ke nê heqaretî benê ser û va:
"Her ke seba kurdan gamê meqûlî yenê eştene çîyê winasî vejîyenê. Hêzê nimiteyî, gladyo û Kemalîstê muzmînî nê heqaretan kenê."
Firatî da zanayene ke mesûlê nê heqaretan serekê partîyan ê û va, "Heqaret şerefmendan û cangorîyanê ma rê kenê. Ganî ma hesabê xo naye ser o bikê ke ma do senî biresê serfirazîyêka şerefmende. Zerrîya mi dejena la ganî ma bi sebir bê."
Firatî qiseykerdişê xo de bale ante muhîmîya Rojawa û parçeyanê bînan yê Kurdistanî ser zî û va:
"Ganî ma seba serkewtişê Rojawa û 3 parçeyanê bînan yê Kurdistanî bi hesab û eqlî hereket bikê."