Meclîsê Weşîya Karkeran û Ewlehîya Karî (ÎSÎG) îlan kerd ke Tirkîya û Vakurê Kurdistanî de par hezar û 897 karkerî merdê û 71ê înan gede yê.
Meclîsê Weşîya Karkeran û Ewlehîya Karî (ÎSÎG) ewro raporê xo yê bi nameyê "Qetlîamê Karî" yê serra 2024î eşkera kerd.
Goreyê raporî, 2024 de sektoranê cîya-cîyayan de pêroyî hezar û 897 karkeran canê xo vindî kerd ke 71ê înan domanan ra bîyê.
Tewr zêde karkerê viraştişê avanbîyayîşî merdê
Tewr zêde sektoranê înşaatî, ray û rayîr û zeretkerdişî de karkerî merdê .
Sektorê înşaatî û ray û rayîran de 482 karkerî, sektorê zeretkerdişî û daristanî de 326 karkerî, sektorê transportî de 234 karkerî, sektorê otel û cayê mendişî de 123 karkerî, sektorê madenî de 103 karkerî û sektorê bazirganî, ofîs, perwerde û sînemagerî de 99 karkerî merdê .
106 cinî û hezar û 791 zî camêrdî
Hezar û 897 karkeran ra 106 cinî û hezar û 791 zî camêrdî bîyê.
Winî zî mîyanê karkeranê ke canê xo dest ra dayê de 94 muhacirî estê.
Hezar û 897 karkeranê ke canê xo dest ra dayê ra teyna 36 yanî % 1,89ê înan endamê sendîkayan bîyê û hezar û 861 yanî % 98,11ê înan endamê sendîkayan nêbîyê.
