Bajarê Îstanbulî de humara kesanê ke seba şimitişê alkola sexte merdê bîye 19.
Reyna 49 kesî zî nexweşxaneyan de yenê dermankerdiş.
Goreyê malumatî, Îstanbul de 24 saetanê peyênan de seba şimitişê alkola sexte 19 kesî merdê û îhtîmal esto ke na hûmare hîna zêde bibo.
Îstanbul de 13ê Çeleyê Peyênî yê 2025î de, Agajan Başîmov û Rahmatullah Artîkov yê ke Tirkmenîstanî bî, seba şimitişê alkola sexte merdîbî û Ravşan Sayîtînîyov o ke nexweşxane de bîyo derman, vizêr merdo.
Rêveberîya Emnîyetî ya Başakşehîrî seba mergê 3 kesanê Tirkmenîstanî dest bi tehqîqatî kerdo.
La heman roje 4 kesê bînî zî merdê.
Ewro 8 kesê bînî zî seba alkola sexte merdê û hûmara kesanê ke bi alkola sexte merdê bîye 19.
Goreyê amaranê Walîtîya Îstanbul, serra 2024î de Îstabul de 110 kesî seba alkola sexte jehr kewtîbî û 48 kesî înan ra merdîbî.
