Bajarê Balikesîrî de 3 karkerê înşaatî ke muzika Kurdkî goşdarî kerdene, bi îdîaya "propagandaya rêxistinî" ra tepişîyayî.
Vizêr, parkê qezaya Alitieylulî ya Balikesîrî de, wexto ke karkerê Kurdî Ozgur Îpek, Mehmet Argin û Cemal Guzel goşdarîya deyîranê Kurdkî kerdêne, polîsan bi îdîaya "dorme şima ra şîkayetkar o" nasnameyê înan kontrol kerdî.
Karkeran vato, ke ê tenya deyîran goşdarî kenê û nêwaştê nasnameyê xo bidê polîsan.
Naye ser polîsan dayê înan ro û ê tepişnayî. Kadir Guzel o ke birayê yew ê karkeran o, derheqê hedîse de qisey kerd û va, birayê ey Cemal Guzel û embazê ey rastê êrişê polîsan û tayê kesanê bînan ê ke parkî de bîyê ameyî.
Karkerî ewro badê îfadedayîşî polîsxane şîy Edlîyeya Balikesîrî.
Her hîrê karkerî bi sucê "propagandaya rêxistinî" ameyî sûcdarkerdiş û bi waştişê tepişnayîşî sewqê mehkema bîyî. Qerarê Mehkemaya Ceza ya Sulhî ya gore her hîrê karkerî bi eynî îdîayan tewqîf bîyî û erşawîyay hepisxane.
