Citkarê ke şewatê Çinarî de zarar dîyê, ê do 50 tonî destegê genimî/xeleyî bigîrê
Seba ke erdê zîraetî ke şewatê Qezaya Çinarî de zarar dîyê bêrê weşkerdene do 50 tonî destegê genimî citkaran rê bêro dayene.
Meclîsê Şaredarîya Şaristanê Girdî, roniştişê hîrêyinî yê kombîyayîşê aşma tebaxe de, seba erdê ziraetî ke 20ê Hezîrane de şewatê ke mabênê Qezaya Çinarî ya Amedî û Qezaya Şemrexî ya Mêrdînî de vejîya û 15 kesî cuya xo vînî kerdî, ci ra zerar dîyê, seba înan qerarêk girewt.
Raporo ke Komîsyonî amade kerd, ame pêşkêşê Meclîsî bi. Meclîsê Şaredarîy raporo ke tede destegê 50 tonî genimî esto ke do seba weşkerdişê erdanê zîraetî ke şewatê Qezaya Çinarî de zarar dîyê, citkaran rê bêro dayene, bi yewvengî qebul kerd.
'Ma do destegê genimî bidê'
Hemverfeka Meclîsê ŞŞA’yî Emîne Akin da zanayîş ke, şewato ke 20ê Hezîrane de mabênê qezayanê Çinar û Şemrexî de vejîya, bi sebebê can û malî û va ke, ê do citkaranê ke şewatî de zarar dîyê, destegê 50 tonî genimî bidê înan.
Serekê Daîreya Xizmetanê Teberî Velat Ozerî zî ard vîrardene ke şewat cayêkê hîrayî de vejîya û erdê ramiteyî zî zerar dîyê û wina va: "Ma goreyê nê tespîtan, seba ke erdê ramiteyî yê Taxayanê Koksalan, Yazçîçegî û Agaçsever ê Qezaya Çinarî zarar dîyo, muxtaran reyde yew xebata fîzîbîlîteyî kerde. Ma do mîyanê aşma teşrîna verêne de şarê xo û citkaranê xo rê destegê toximê genimî bidê."
