ZAZAKÎ NEWS - Vervatoxa DEM Partî Ayşegule Dogane ard ziwan ke ê amadekarîye kenê ke demêko kilm de şirê Îmralî û Abdullah Ocalanî zîyaret bikerê.
Vervatoxa Partîya DEMÎ Ayşegule Dogane, merkezê partîya xo de derheqê kombîyayîşê Heyetê Rayraberdene ya Merkezî (MYK) de kombîyayîşê çapemenîye viraşt. Ayşegule Dogane da zanayîş ke yew babetanê serekîyan ra no ke MYK de ameyo munaqeşekerdiş, komîsyono ke yeno plankerdene ke Meclîs de bêro awankerdene yo. Ayşegule Dogane ard ziwan ke meseleya Kurdan tena meseleya Kurdan nîya û ê seba çareserkerdişê mesele amadekarîye kenê. Dogane nîşan kerd ke partîyê muxalefetî yê ke ê înan reyde ameyê pê, waştişê “têkilîya raşt bi raşte, îrtîbat, babet ser o agahdarkerdiş û aşkereyîye (zelaltî)” kenê.
Ocalanî waşt ke Barzanî bivîno
Ayşegule Dogane qiseykerdişê xo nê çîyî ardî vatî:
“Wexto ke ma giranîye û hîrayîya mesele çiman ver o gênê; ma fîkîrîyenê ke do seba birêz Ocalanî feydeyin bo ke o bi birêz Mesut Barzanî, birêz Nêçîrvan Barzanî, birêz Mazlum Ebdî, birêz Qubad û Bafil Talabanî reyde pêvînayîşan bikero. Ma zî zanenê ke o wazeno ke nê pêvînayîşan bikero. Ma wazenê ke nê çîyî raya pêroyî reyde pare bikere. No waştişê birêz Ocalanî yo. Ma zî fîkîrîyenê ke no do feydeyin bo. Seba ey zaf erjaye û muhîm o ke o bi serekanê partîyanê sîyasîyan ê cîyayan û şexsîyetanê muhîman reyde bêro têhet..”