ZAZAKÎ NEWS - Koordînatora çapemenîye ya gemîya Madleenî, Yasemîn Acar, seba ke ablukaya (dorpeçê) Xeze derya ra bişikna, 1ê Hezîrane de Îtalya rayîr. Gelo, Yasemîn Acar kam a?
Yasemîn Acar
Yasemîn Acar yew aktîvîsta 37 serre ya. A, sey qîjeka (domanêka) yew keyeyê Kurdî (Zaza) Almanya de ameya dinya û uca de bîya pîl. Goreyo ke zanîyeno a Çewlîgj a . A, 15 serrîya xo ra nata sey aktîvîste seba heqanê mihaciran (multecîyan) û însanan xebitîyena û vera nijadperestîya vera Misilmanan û Kurdan de vindena. Yasemîne, seba ke mihaciran rê ardim bikera Almanya de xeylêk sazîyan reyde pîya gurîyaya û tecrubeyê aye yê ciwanan reyde gurîyayîş zaf o.
Wextê îşxalê Ukrayna de, ardim kerdo ke 15.000 dilxwazî seferber bibê û dezgehê "Berlin Arrival Support"î nayo ro. Nê demî de, derheqê çareserkerdişê krîzê penaberan de Senatoyê Berlînî rê şêwirmendîye (danîşmanîye) kerde û hukumatî ser o zext viraşto.
Yasemîn, serranê dergan ra nata sey pawitoxa akerde ya dewaya Fîlîstînî xebitîyena û nika Berlîn de xoverdayîşanê (protestoyanê) girdan, çalakîyanê raşt bi raştî û fealîyetanê cîya-cîyayan organîze kena.
Yasemîn, ke yew keyeyê Kurdî ra yena, fîkîrîyena ke xoverodayîş yew tercîh nîyo, belkî yew terzê cuyayîşî yo. Dadî û babîyê aye her wext aye rê musna ke rayîrê "HEQ"î ser o şora, çimkî înan bawer kerdêne ke no, rayîrê cuyayîşî yo tewr esîl o. Yasemîn, bi zerrî ra edaletê komelkî (sosyalî) û heq û ewleyîya domanan rê bawer kena. A bawer kena ke ma ganî cayê ke aştîye bigêrîme, seba edaletî xebat bikerîme, çimkî cayo ke tede edalet bibo, aştîye zî uca de peyda bena.
Acar, ke Koalîsyonê Fîloya Azadîye (Freedom Flotilla Coalition) de sey Berpirsîyara Organîzasyonî û Endama Desteya Rayraberdene wezîfe kena, qefleya gemîya yardimê însanî ya Madleenî ke Îtalya ra şîye, tede sey koordînatora çapemenîye ca girewt.
Yasemîn Acar ke welatîya Almanya ya û 37 serre ya, emrê xo dayo xoverodayîşê heqanê însanan ê unîversalî.
