Baroya Dîyarbekirî derheqê Avukat Bermal Yildeniza ke sondê xo bi Kurdkî wendbi de beyanatêk da.
Avukat Bermal Yildenize badê ke stajê xo qedêna, verê bi Kurdkî, dima bi Tirkî sondê xo yê qanunî wend û destpê karê xo kerd.
Baroya Dîyarbekirî dima vîdyoyê ke Bermal Yildeniz bi Kurdkî sond wena vila kerd. No vîdyo demêko kilm de medyaya sosyale de bî rojev û nijadperestanê Tirkan Bermal Yildeniz û Baroya Dîyarbekirî kerdî hedef.
"Bêtehemulîya vera Kurdkî ya"
Baroya Dîyarbekirî îşaret kerd ke na helweste bêtehemulîya vera Kurdkî nîşan dana û va: "Nê hêrîşî bêtehemulîya vera ziwanê Kurdkî reyna nîşan da. Astengkerdiş û kirarê cîyakerî yê ke nêverdanê Kurdkî Tirkîya de cayê umûmîyan de bêro şuxulnayîş bi serran o dewam kenê. Ma hêrîşê nijadperestî û kîndarî yê ke embazê ma ser o bîyê şermezar kenê û bêtehemulîya vera Kurdkî qebul nêkenê."
Bi Tirkî zî sond wendbî
Baroya Dîyarbekirî îfade kerd ke Bermal Yildenize sondê xo bi Tirkî zî werdo û desturê xo yê Avukatîye girewto.
