Emser 25 hezar kesî muzexaneya penîrî ya wîlayetê Qersî ya Bakurê Kurdistanî zîyaret kerd.
Qers, Tirkîya û Bakurê Kurdistanî rê merkezêkê muhîm yê viraştişê penîrî yo.
Muzexane de heme prosesê viraştişê penîranê tewiran bi maket û peykeran ver çiman ameya ronayene.
"Muzexaneya tewr girde ya penîrî ya"
Rêberîya Muzexaneyî Yeşim Koçe muzexaneye ser wina va:
"Muzexaneya ma serra 2022yî zîyaretan rê ameye akerdene.
Tirkîya de teyna muzexaneya penîrî ya û sewîyeya dinya de zî muzexaneya tewr girde ya penîrî ya.
Nika zî eleqeyêka zêde esta û na ca roşnîya çimê ma ya."
Mîyanê muzexaneyî de amûrê kehenî yê tewirê cîya-cîyayanê viraştişê penîrî û cuya heywankarî û wareyî zî yena pêşkêşkerdiş.
3 aşman de 25 hezarî kesî şîyê zîyaretê muzexane
3 aşmanê verênan ê serra 2025î de 25 hezarî ra zêdêr kesî şîyê zîyaretê muzexane.
Yeşîm Koçe va, "Mîyanê muzexane de maketan û peykeran ra teber zaf amûrî zî estê.
Bi taybetî mîkserê têlî yê ke seba penîranê gravyer û kaşarî yenê xebitnayene estê.
Qers merkezêko muhîm yê heywandarî yo û debara sereke ya welatîyan heywan û berhemê şitî yo.
Goreyê raporanê Sazîya Zîretî û Daristanî ya Qersî yê 2024î, Qers de 604 hezar û 296 heywanê girdî û 705 hezar û 626 heywanê qijî estê.
Qers de serrane zêdeyê 600 hezar ton şit û 15 hezar ton penîrê kaşarî yenê viraştene.
