Varvatoxa DEM Partî Ayşegul Dogan eşkera kerd ke înan semedê şîyayîşê Îmralî yo hîrêyîn muracat kerdo.
Vervatoxa Partîya Seypeyî û Demokrasî ya Şaran (DEM Partî) Ayşegul Dogan merkezê pêroyî yê partî de beyanat da. Ayşegul Dogan da zanayîş ke, Heyeta Îmralî semedo ke reya hîrêyîne şêro Abdullah Ocalanî reyde pêvînayîş bikero ewro muracat kerd.
Ayşegul Dogan wina va: "Ma pawenê ke wextêko tewr kilm de, mîyanê nê hewteyî de seba pêvînayîşê Ocalanî heyeta ma şêro Îmralî. Agêrayîşê Îmralî de do derheqê meseleya çekronayîşî heyeta ma beyanatêko hîra bido."
Ayşegul Dogan, eleqe ant ser mesajê Abdullah Ocalanî gelo do bi vîdeo bo yan nê û nê çîyî îfade kerdî: "Na mesele hema eşkera nêbîya, labelê ma hêvî kenê ke no vengdayîş bi vîdeo bo. Mesaja bi vîdeo do gelek hetan ra hîna weş bo. Xora ma zaf rey vato ke ganî tecrîd bêro wedardayene. Waştişê şarî zî no yo. Tesîrê beyanatêkê bi vîdeo do hîna zêde bo."