Ma nê nuşteyî de behsê dersanê weçînayeyan bike.
Tirkîya de dersê weçînayeyî yê kurdkî, dersê kurdkî yê ke mektebanê dewlete de tayê wendekaran rê sey dersê weçînayeyî yenê pêşkêşkerdene ra vajîyêno.
Mektebanê Tirkîya de sinifa 4. a mektebanê destpêkî û sinifanê 5, 6, 7 û 8. yê mektebanê mîyanênî de, teberê dersanê mecburî, eşkenê 3 dersî zî sey dersê weçînayeyî biweçînê.
Çarçewaya Ziwan û Zarawayê Ganî (sinifê 5, 6, 7 û 8) de zarawayê kurmanckî û kirmanckî (zazakî) yê kurdkî mîyanê dersanê weçînayeyan de yê.
Dersanê weçînayeyan de keyeyê wendekarî/e weçînenê ke gedeyê înan hefte de 2 saetî kamcîn derse bivînê. Goreyê tewirê mektebî, no saet vejîyêno 4î yan şino 1î. Seba ke derso weçîna bêro dayene, ganî tewr tay 10 wendekarî muracat bikê.
Seba ke yew mamosta bieşko dersê kurdkî bido, ganî hefte de tewr tay 15 saetî dersê kurdkî bido. No zî beno fersend seba mamosteyê kurdkî yê ke nêameyê tayînkerdene.
Seba ke yew mamosta bieşko yew mekteb de dersanê kurdkî bido ganî tewr tay 10 sinifî bêrê akerdene û her sinif de zî tewr tay 10 wendekarî bibê. Yanî tewr tay 100 wendekarî ziwanê kurdkî sey dersê weçînayeyî biweçînê, Wezaretê Perwerdeyî mamostayanê ziwanê kurdkî tayînê ê mektebî keno.
Wezaretê Perwerdeyê Neteweyî yê Tirkîya bi Rêbera Dersanê Weçînayeyan a ke numreyê aye 12668 o û bi numreya 2012/37 serra 2012î de îmkan ame dayene ke kurmanckî û kirmanckî (zazakî) binê nameyê Ziwan û Zarawayê Ganî de hetê wendekaranê sinifanê 5, 6, 7 û 8î ra bêrê weçînayene.
Seba averşîyayîşê hîşmendîya ziwanî û seba weçînayîşê ziwanê kurdkî sey dersê weçînayeyî zaf sazîyê ziwanî û komelê komelkî bale ancenê mesela ser, xebatan kenê û veng danê şarî.
Tirkîya de zafaneya kurdan wazenê ke ziwanê kurdkî bibo ziwano resmî û bibo ziwanê perwerdeyî. Tayê kurdî vanê dersê weçînayeyî kêmî manenê û nê semedî ra weçînayîşê ziwanê kurdkî sey dersê weçînayeyî red kenê.
Yeno vatene ke zaf kesî zî seba ke dersanê kurdkî ra xeberdar nîyê, kurdkî nêweçînenê.
Tirkîya de Mektebanê Mîyanînan de muracatê seba dersanê weçînayeyan dest pêkerd
Serra perwerdeyî ya 2024-2025î de seba sinifanê 5, 6, 7 û 8î, çarçewaya dersanê weçînayeyan de seba dersê kurdkî (kurmanckî û zazakî), muracatî do 3-17ê Sibate dest pêbikerê.