Şaredarîya Amedî ya Şaristanê Girdî, seba gedeyanê qezaya Sûrî "Gêrayîşê Zerreyê Sûrî û Pirdê Des Berinî" organîze kerd.
Mudirîya Şubeyê Turîzmî ya Serekîya Daîreya Karê Kulturî û Sosyalan, gêrayîşanê xo yê dayîşşinasnayîşê bajarî ser o yewna bîne zêde kerd. Gêrayîşê daşinasnayîşê bajarî de ke seba wayîrvejîyayîşê potansîyelê turîzmî yê bajarî yeno kerdene, Zereyê Sûrî ke hetê turîzmê tarîx, kultur û bawerî ra cayêko muhîm o, ame gêrayene.
Gedeyî cayê tarîxî gêrayî
24 gedeyî ke Sûr de ronişenê, çarçewaya daşinasnayîşî de Pirdê Des Berinî, Baxçeyê Hewselî, Muzeya Bajarî ya Konaxê Cemîl Paşayî, Keyeyê Dengbêjan, Dêra Surp Gîragosî, Camîyo Pîl, Xanê Hesen Paşayî, Îçkale û Camîyê Hz. Suleymanî ra gêrayî.
Rehberê profesyonelî yê bi kokartan ke girêdayeyê Mudirîya Şubeyê Turîzmî yê, gedeyê ke beşdarê gêrayîşî bîy, înan reyde amade bîy û derheqê cayanê tarîx û kulturî de melumatê biteferuat dayî. Gêrayîşî de ke gedeyan bi keyf kay kerd û derheqê bajarî de melumatî girewtî, hemê hewcedarîyê înan hetê şaredarîye ra ameyî temînkerdene û taştîya înan ameye dayene. Gedeyan îfade kerdî ke gêrayîşî de ke heta şan ramit, demo bikeyf û weş ciwîyayî. Şaredarîya Şaristanê Girdî rê sipas kerd û keyfweşîya xo ard ziwan.
Gêrayîşî do dewam bikerê
Mudirîya Şûbeyê Turîzmî ya Serekîya Daîreya Karê Kultur û Sosyalan, eke şertê hewayî munasib bo, seba wendekarê mektebanê dewan û gedeyê ke bajar de ronişenê do dewam bikero ke gêrayîşan organîze bikero.
