Dîyarbekir de se ra 25 zem erzîya çay ser, labelê çayxaneyan hema se ra se vayîya çaye zêdna. Dîyarbekir de tay cayan de çaye 30 TL ra yena rotiş.
Çaya ke parçeyêko muhîm ê cuya rojane ya, kulturê Diyarbekirî de cayêko muhîm gêna. Krîzê ekonomîk reyde ferqê vayîya mabênê Bağlar û Diclekentî hîna zêde bi.
Her serre tarîfeyê vayîye hetê Odaya Viraştoxanê Qehwe ra yeno bewlîkerdiş. Labelê qehwexaneyî û çayxaneyî goreyê na tarîfeyî nêxebitîyenê.
10 lîre yo tarîfeyo newe
Tarîfeyo newe de qehwexaneyan de çaye 7,50 lîre ra bîye 10 lîre; Vayîya çaye çayxaneyan de 13 lîre ra bî 17 lîre. Qehwe ke nê demê peyênan zaf zêde şimîyeno goreyê terîfeyî 20 û 30 lîre ra vejîya 35 lîre.
'150 lîre ra zêdê roşîyeno'
Serekê Odaya Qehwexaneyanê Diyarbekirî Abdurrahman Kavutî Amida Haberî rê qisey kerdi û da zanayîş ke, tarîfeyo ke qehwexane, çayxane û kafeteryan rê ameyo dîyarkerdiş nêno ca. Kavutî wina va: "Ma vayîya çaye 7,50 lîre ra kerd 10 lîre. Labelê kes goreyê nê tarîfeyî nêyeno. Her kes bahayanê cîya-cîyayan xebitneno. Ma vayîya qehwe 35 lîre dîyar kerd labelê zaf cayan di 150 lîre ra zêdê roşîyeno."
Xebere: Zelal Siyaniç
Çime: Amida Haber
