SERMEST
Şewa yelda, şewa tewr derge. Verê cû çirey dergîya na şewe bala mi nêantîbî, ez pê nêhesîyabî. La emser raşta zî semedê mi û embazanê mi na şewe zaf bîye derg û wina aseno ke do dewam bikera. Ma se kerd? A raşt ma çîyêko zaf pîl zî nêkerd; çend hebî estanîkî çend hebî kîlamî û tayê meymanî. La xora ma zî ‘çîyêko pîl’ nîyê. Coka zazakî de israrkerdiş, zazakî rê curetkerdiş, bi zazakî vengdayîş ma rê zehmet ê.
Ma Îstanbul de mîyanê 20 mîlyonan însanan de ciwîyenê. Sey yew mamostayî wendekarê mi zaf ê, muxatabê mi henzar ê. Sey yew mamostayî ez şêra cayêk şar ewnîyeno mi ra, destê mi zerrî ra gêno. Wexto ke ez bi zîwanê Tirkî nuşteyêk nusena bi seyan mesaj û wendoxî yenê pêser la ti ke bi zazakî venga Îstanbulî bide, ti ke ziwanê xo de înat bîkere vînenî ke no bajaro metropol çendêk beno qij çendê tenî manenê. Tena Îstanbul ney ha Çolîg ha Amed ha Dêrsim. .. Ti zîwanê xo de israr bîkî bajaran vurîyenê dinya bena dewêke.
Portreyêko yewna tewir vecîyeno verê to. Ancîna zî ma zanenê ke eslê xo de ziwanê ma nê fotografî ra zafêr o. Na rewşe rewşêka zûrayîn a, rewşa ewroyîn a. Ewro est a siba çin a.
Ma çendê embazan bîney xo eşt nata ard weta û programêko weş vecîya meydan. Şewa ma bi vatişê estanikan dest pêkerd. Mem Keleşî ra dima Alîşan Onlu yî estanîkê xo wendî. Tayê deyîranê qedîman ra dima şewa ma qedîyaye. Ez programî ra zafêr bi şinasnayîşê Alîşan Xocayî keyfweş bîya. Programî ra zafêr mi o goştarî kerd, ez ewnîya ey ra û derheqê ey de fikirîya. Coka ez qayîl a ke behsê ci bikera.
Mi Alîşan Xoca ra tena sanîkî goştarî nêkerd. Ez bi dîqetî ewnîyaya ey ra, enerjîya ey ra, kelecanê ey ra. O qasê 50 serre yo ez 25 serre ya. Rey rey xebata zazakî mi rê giran yena. Ez ewnîyaya ey ra û mi va ke qet nêbo hema 25 serrê mi est ê. Ey mi rê va ke ey vatêne qey ê neslo peyên ê ke zazakî ser o xebitîyenê û ê xortê sey ma vînenê hevîdar benê. Mi zî vatêne qey ma neslo peyên ê. La hêdî ez şik nêkena. Bêşik çîyo ke mende yo zîwanê ma yo. Ne ez ne o ne zî ê bîn ê. Wexto ke ez kişta ey de ronîşta çîyo ke ey hîs kerdêne mi zî hîs kerd Bê qalkerdiş ma yewbînî fam kerd. O edî dostê min o, hevalê min o û hinî ma yewbînan nêvînê zî ma embaz ê. Ey estanîkê qedîmî vatî la mi estanikê ma yê ewroyînî fam kerdî. Estanikê ma yew ê. Çunke ma mendî, tayî şîyî, tayî remayî, tayînan xo vîr ra kerd, tayî kewtî peyê pêrodayîşanê zaf muhîman, tayî bîyî merdimê pîlî, tayî hêrs bîyî la ma ra tayî mendî.
Qalanê Umer Birayî ra:
Şima şêrîn ez bineyna manena
hema vateyê xo yê peyin nêvato koyan
vengê pamendayan zimeno,
vîyeranê xorînan de
pekeno yeno versîya mazêran de aresîyeno
şima şêrîn ez bineyna manena
mi a pîyarêya xîçîne kerda vîndî
verar şîyî yewbînan,
sey gîesterayan berîqyenî
çime embazan
koçenî resneyanê xo, qerîfnenî
zimenî rîyê tatan ser de hîrhîrê astoran
şima şêrîn ez bineyna manena
qerqeleyê kalikan veng a mi danî
