Roşan Lezgînî hewteyo vere dabi pêhesnayîş ke, “xebata ey a ferhengî temam bîya, na xebata ey semedê înanê ke wazenê Zazakî binusnê eynî wext de rêberê raştnuştişê kelîmeyan o û hewteyê vernîya ma de vejîyo.”
Lezgînî hesabê xo yê Xî ra aşkere kerd ke xebata ey bi tamamî çap bîya û va “Ferhengê Zazakî - Tirkî & Tirkî – Zazakî ke yew demo derg ra ez ser o xebetîyayne, ewro sey kitab resa Diyarbekir. Ferheng ebadê 13.5 x 21 cm de 504 rîpelî yo. Qismê Zazakî - Tirkî de 13.664 madeyî, qismê Tirkî - Zazakî de 12.419 madeyî estê.”
Ferheng 504 rîpelî yo
Lezgînî derheqê xebata ey ya ferhengî de vêrê cû nê malumatî daybî:
“Dosyaya Ferhengê Zazakî - Tirkî & Tirkî – Zazakî ke yew demo derg ra ez ser o xebetîyena ewro şî metbea, înşelah do eno hewteyê vernîya ma de vejîyo. Ferheng ebadê 13.5 x 21 cm de 504 rîpelî yo.
Mi eno ferheng semedê yew îhtîyaco raşt û pratîk yê wendoxan û nuştoxanê Zazakî amade kerd, coka tenya kokê kelîmeyan esas girewt, kelîmeyî nêviraştî û ca nêda fiîlanê terkîbî û tehbîrkî zî.
Qismê Zazakî - Tirkî de 13.664 madeyî, qismê Tirkî - Zazakî de 12.419 madeyî estê. Mi zafê kelîmeyanê Zazakî gelek eserê ke bi Zazakî nusîyayê ra arêdayî û formê ziwanê nuştekî de nuştî. Ferheng ,semedê înanê ke wazenê Zazakî binusnê eynî wext de rêberê raştnuştişê kelîmeyan o.
Xebata min a amadekerdişê ferhengê tenya bi Zazakî îzehkerdişê mehnaya kelîmeyan zî dewam kena. Homa hes bikero, o zî do rojêk amade bibo.”
