Şaredarîya Amedî ya Şaristanê Girdî, çar taxanê bajarî de seba gedeyan aktîvîteya atolyeya muzîk û resimî organîze kerd.
Serekîya Daîreya Karanê Kulturî û Sosyalan, seba ke qabîlîyet û potansîyelê gedeyan bivejîyo meydan û eleqeyê înan ê hunerî reyde zêde bikero, xebatanê xo dewam kena.
Na çarçewa de Taxa Bagîvar û Çarikli ya Qezaya Sûrî, Taxa Ferîtkoşkî ya Qezaya Yenîşehîrî û Taxa Şêx Şamîlî ya Qezaya Baglarî de Atolyeya Hunerî ya Gedeyan ameye viraştene.
Atolyeyanê ke bi hemkarîya Ma Music Center ameyî organîzekerdene, tede mamosteyî, bi erbane û deyîranê ke bala gedeyan ancenê, taxan ra gêrayî û gedeyî arê dayî.
Mamosteyî, gedeyan reyde deyîrî kerdî, enstrumanî cinayî û resimî viraşt.
Gedeyanê ke çember viraşt, keyf kerd û rojêka weşe vîyarnaye.
